"Арсенал" ва МЮ "Боруссия" юлдузини қўлга киритишмоқчи

"Арсенал" Дортмунднинг "Боруссия" клуби ҳужумчиси Карим Адейемини сотиб олиш учун "Манчестер Юнайтед" билан рақобатга киришди. Клублардан бири 23 ёшли футболчини қишда сотиб олиши мумкин. Бу ҳақда TEAMtalk хабар бермоқда.

Манбага кўра, футболчи "асаларилар" билан янги шартнома бўйича келиша олмаган, шундан сўнг бошқа жамоалар унга бўлган қизиқишни кучайтирган. Таъкидланишича, "Боруссия" қишки трансферлар вақтида Адеемини 70 млн евродан камига сотмоқчи эмас. Ҳужумчининг атрофидагилар унинг Лондонга кўчиб ўтиши тарафдори.

Жорий мавсумда германиялик футболчи барча мусобақаларда 14 та ўйинда майдонга тушиб, 3 та гол ва 3 та голли узатмага муаллифлик қилди. Футболчининг клуб билан амалдаги меҳнат шартномаси 2027 йилнинг ёзига қадар мўлжалланган. "Трансфермаркт" порталида келтирилган маълумотларга кўра, футболчининг бозор нархи 60 млн еврони ташкил этади.