Асфальтда маст холда ухлаб қолган Жек нега Рой Киндан қочиб юрибди?!

SPORTS.uz АПЛнинг жорий мавсумидаги энг яхши плеймэйкерларидан бири бўлиб турган Жек Грилиш ҳақида фикр алмашади.

Ичкилик ва тунги базмлар шайдоси

«Астон Вилла» сардорини афсонавий Пол Гаскойнга ўхшаб кетиши бор гап. У ҳам ичкилик ва тунги сайрларни жуда хуш кўради. 2015 йилда Жек дам олиш мақсадида Испанияга йўл олади. Орадан бир неча кун ўтиб, унинг Тенерифе кўчаларидан бирида маст ҳолда ухлаб ётгани акс этган сурат интернетни портлатади.

Аслида, тартиб-интизом борасида Грилишнинг муаммолари жуда кўп. 2020 йилда ўз ижтимоий тармоқларидаги обуначиларига уйда қолишни тавсия қилган футболчи, орадан бир неча соат ўтиб, автомашинасида бахтсиз ҳодисага учрайди. Кейинроқ маълум бўлишича, Жек яширин тунги базмга шошиб кетаётган экан. Бу хабар омма юзини кўргач, «Манчестер Юнайтед» Грилиш трансферидан воз кечди.

Қаҳрамонимиз жанжал ва тўполонларга бой ҳаёт тарзига кўникиб қолган. Уни суд залида кўриш одатий ҳолга айланиб бўлди. Муштлашув, модель қизлар билан жанжаллари, ичкилик ва бошқа ёмон иллатлар сабабли, Жек ўз имижини анча тушириб юборди, бироқ...

У Рой Кин билан тўқнаш келмаслиги керак

Ирландия терма жамоаси ва «Манчестер Юнайтед» собиқ сардори – Рой Кин анчадан бери Грилишнинг манзилига «илиқ» сўзлар айтишдан чарчамаяпти. У "Астон Вилла" сардорини Ирландия терма жамоасидан воз кечгани учун жуда ёмон кўради.

Бунга Кинда етарлича асос мавжуд. Жек Ирландиянинг турли ёшдаги терма жамоаларида 19 бор майдонга тушган. Ҳатто унга сардорлик боғичи ҳам топширилган. Кейинроқ, Грилиш Англия термаси либосини кийишга қарор қилди.

Мухлислар Грилишни катта мусобақаларда иштирок этиш мақсадида Англияни танлаганини сира кечира олмайди. Рой Кин эса, биринчи имкон бўлиши билан Жекни Ирландия халқига хиёнат қилганликда айбламоқда.

«Агар Англия учун тўп сурмоқчи бўлсанг, нега Ирландиядан келиб тушган таклифни қабул қилдинг, болакай?! Агар сабр қилганингда, улар сен билан алоқага чиқар эди. Сен кутишни истамадинг. Ирландия халқига умид бердинг ва яшил либосни танладинг. Кўп ўтмай, инглизлар алоқага чиққанида, дарров сенга ишонганларни унутиб юбординг. Бу хиёнатдан бошқа нарса эмас!»

Грилишнинг даражаси «Астон Вилла»никидан ўзиб кетди

«Астон Вилла» Грилиш учун бегона эмас. Унинг катта бобоси Билли Гаррети «Вилла Парк» шарафини ҳимоя қилган. Ўтган аср бошида тўп сурган ҳужумчи бирмингемликлар билан икки бор Англия чемпионига айланган. Орадан 120 йил ўтиб, Гарретининг авлоди саналган Грилиш «Вилла Парк»даги мухлисларни хурсанд қилмоқда.

Жекнинг ўйини Чемпионшипда тобланди. 3 мавсум давомида асосий лигага чиқишга уринган клуб Грилишнинг ёрдамисиз АПЛга қайта олмас эди. Ўтган мавсумда айнан Жекнинг голлари клубни элитада жон сақлаб қолишига кўмаклашди. Жек хавфли вазият яратиш борасида "топ-5" вакиллари орасида етакчи. Ҳатто Бруно Фернандеш, Кевин Де Брюйне, Жейдон Санчо ҳам ҳужум бошлашда ундан орқада қолмоқда.

Шахсий статистикаси ҳам чакки эмас: 6+9 «Астон Вилла» футболчиси учун фантастик рақамлар. Сайёрамизнинг энг шиддатли чемпионати ўртасида бундай натижа кўрсатиш учун қолганлардан бир бош баланд даражада тўп суриш лозим. Бу ишни ҳозирча Грилиш уддаламоқда. Унинг кучлироқ клубга ўтиши кераклигини аллақачон аниқ бўлган, бироқ тартибсиз ҳаёт тарзи бунга тўсқинлик қилмоқда.

Грандлар нега унга кўз тиккан?

Биринчи навбатда, Жек ичкиликдан узоқлашиши керак. Бу унинг супер иқтидорини янада ёрқин намойиш этиш учун имкон яратади. «Астон Вилла» ўз халоскори билан хайрлашишни истамайди, лекин барча Англия терма жамоаси аъзосининг кетишини сезиб турибди.

Ўз вақтида, Фергюссон Гиггз ва бошқаларни шахсий детектив ёллаб кузатган эди. Балки, Грилишга ҳам шундай қаттиқ қўл мураббий керакдир?! Бирмингем клубидан савияси баланд эканлигини билиб турган Жекни бошқариш деярли имконсиз. Балки, грандлар сафида уни тўлиқ қўлга олиш мумкин бўлар.

Сўнгги ойларда Жек ўз ҳаёт тарзини анча тартибга келтирди. Машғулотлардан сўнг, базада қолишни бошлади. Жисмоний машғулотларга кўпроқ урғу бермоқда. «Астон Вилла» устози Динь Смит ҳам ижобий ўзгаришларни бир неча бор таъкидлаб ўтди.

"У ўз устида ишлаш борасида беназир. Айниқса, сўнгги пайтларда аввалгидан бир мунча кўпроқ машқ қилаётгани мени хурсанд қилмоқда. Жек ўзгача эканлигини яхши билади. Фақат бу омилни майдонга кўчириш учун меҳнат қилиш керак. Ўйлашимча, буни Грилиш яхши англаб турибди».

Инглиз нашрларининг маълум қилишича, футболчи модель қизлар билан ҳам алоқаларни тўхтатган. Ҳозирда, мураббийларнинг кўрсатмасини тўлиқ бажариш учун қўшимча назарий дарслар олмоқда.

Катта эҳтимол билан, қаҳрамонимиз ўзининг пик формасига кўтарилганини англаб етган. Аввалгидек, унинг қилиқларини ҳеч ким ёшликка йўймади. Сўнгги 60 та ўйинда Грилиш «Астон Вилла»нинг ҳимоядаги энг яхши футболчисига айланиб олди. У ҳар бир ўйинда ўртача 2,4 бор рақиблардан майдон марказида тўпни олиб қўймоқда. Жек туғма етакчи. Бу ҳислати орқали бирор бир инглиз клубининг асосий футболчиси даражасига кўтарилади. Агар Грилишнинг кўнглига йўл топадиган мураббий бўлса, у яқин келажакда АПЛнинг биринчи рақамли футболчисига айланиши аниқ.