Асрор Алиқулов: "Футболчимиз хиссиётларини жиловлай олмади"

Бугун Про лиганинг 11-турида воҳа дербиси бўлиб ўтди. 3 та қизил карточка кўрсатилган ўйинда “Шўртан” иродасини кўрсатиб “Машъал”ни 2:1 ҳисобида енгди. Мезбонлар 90 ва 90+6-дақиқаларда голлар уриб ғалабани илиб кетди. Ўйиндан кейин “Машъал” бош мураббийи Асрор Алиқулов шундай деди:

- Оғир ўйин ўтказдик. Биринчи бўлим хиссиётли бўлди. Футболчилар қўйилган мақсад ва тактикани яхши бажаришди, дея оламан. Гол урдик, яхши ҳимояландик. “Шўртан”ни қандай ўйнашини биламиз. Афсуски, бугун провокацияларга учрадик. Айтиш мумкинки, ҳакам ҳам кўп нарсага йўл қўйиб берди. Оғир ўйин, қизил карточка ва ғалабани қўлдан бой бердик.

- Бирданига икки футболчи майдондан четлатилди. Бу жамоадаги тартиб-интизом билан боғлиқми ёки ҳакамлар савиясими?

- Биринчи бўлимда ҳам Холтўраев тўп учун курашларда тирсакларини ишга солаётганди, ҳакам эътибор қаратишини кутдик. Лекин барибир футболчимиз хиссиётини жиловлай олмади. Бу ўйинчимизнинг хатоси. Охиригача чидаш ва футболчига хос бўлган ҳаракат қилиш керак. Афсуски, футболчимиз хиссиётларини жиловлай олмади. Иложи йўқ, энди кейинги ўйинга тайёргарлик кўрамиз. Иккита қизил карточка бўлди ва четлатилган ўйинчиларнинг ўринларини тўлдиришга ҳаракат қиламиз.