"Астон Вилла" етакчиси ёзда жамоани тарк этиши мумкин. Футболчига Лондон клуби даъвогар

Бирмингемнинг "Астон Вилла" жамоаси ҳужумчиси Морган Рожерс жорий мавсум якунидан сўнг клубини ўзгартириши мумкин. Бу ҳақда нуфузли инсайдер Фабрицио Романо ижтимоий тармоқлар орқали хабар берди.

Манбага кўра, 23 ёшли футболчини ўз сафига қўшиб олишга Лондоннинг "Челси" клуби қизиқиш билдирмоқда. Transfermarkt портали Рожерснинг трансфер қийматини 70 миллион евро деб баҳолаган.

Морган Рожерснинг "Астон Вилла" билан амалдаги шартномаси 2031 йил июнь ойи охирига қадар амал қилади.

Англия Премьер-лигасининг жорий мавсумида ҳужумчи 17 та учрашувда иштирок этиб, еттита гол урди ва учта голли узатмани амалга оширди.