"Атлетик" футболчиси 10 ойга допинг учун дисквалификация қилинди

'Атлетик Бильбао" ҳимоячиси Йерай Альварес 10 ойга майдондан четлатилди. Бу ҳақда клуб расман маълум қилди.

Июль ойида футболчида допинг-тест мусбат чиққанидан кейин вақтинча четлатилган эди. Альварес тақиқланган модда соч тўкилишига қарши дори таркибида бўлганини айтди.

УЕФА интизомий органи футболчи тақиқланган моддани қасддан қабул қилмаганини тан олди, аммо барибир унинг жавобгар эканини таъкидлади.

Дисквалификация 2 июндан амал қила бошлайди. Шу боис, испаниялик ҳимоячи 2 апрелдан майдонга қайтиши мумкин. Жамоа билан машғулотларга эса 2 ой аввал киришади.

Яқин кунларда Альварес матбуот анжумани ўтказиб, вазиятни изоҳлаб беради.