Авлиёхон Ҳамидов: "UFCда жанг қилишим мумкин эди"

Маълумки, 19 февраль куни Тошкентда U1 ҳамда Қозоғистоннинг "Октагон" промоушени ҳамкорлигида катта ММА кечаси ташкил этилади. 

Мазкур турнирда бир қатор юртимизнинг машҳур ММА вакиллари октагонга кўтарилади. Улар орасида ўта енгил вазн (61.2 кг) тоифасида фаолият юритадиган, машҳур жангчиларимиздан бири Авлиёхон Ҳамидов (10-3-1) ҳам бор. 

Ушбу ҳамюртимиз Тошкентда озарбайжонлик Руслан Маммадовга қарши баҳс юритади. Авлиёхон сўнги жангини 2021 йил 15 январда Абу-Даби мезбонлигидаги UAE Warriors промоушени ташкил қилган турнирда канадалик Луис Жордейнга қарши ўтказиб, ғалаба қозонган эди. Қизиқ жиҳати, ушбу турнирни бевосита UFC президенти Дана Уайт ҳамда Ҳабиб Нурмагомедов кузатиб борган ва ушбу жангдан сўнг, юртдошимизни жаҳоннинг нуфузли промоушенига ўтиши ҳақида хабарлар пайдо бўлганди. Бироқ, бу борада олдинга силжиш кузатилмади.

Биз ушбу саволларга жавоб олиш учун Авлиёҳон Ҳамидов билан боғландик. 

- 19 февраль куни Тошкентда жанг қиламан. Рақибим борасида фақат ижобий фикрларни билдириш мумкин. Ҳа, БААда жанг ўтказганимдан кейин, яхши фикрлар билдирилди ва UFCда ҳам жанг қилишим мумкин эди. Бироқ, виза билан боғлиқ муаммолар туфайли, бу амалга ошган йўқ. Аммо ҳаракат қилмоқдамиз ва насиб қилса, жаҳоннинг машҳур промоушенларида ҳам жанг ўтказамиз, деган умиддаман. Ҳозирча бор эътиборим 19 февраль кунги жангга қаратилган. Тайёргарлик аъло даражада ва Тошкентдаги жангда ҳам чиройли ғалаба билан барчани хурсанд қиламан, деган ниятдаман.