"Аякс" япониялик футболчини ўз сафига қўшиб олмоқчи

"Арсенал"нинг собиқ ҳимоячиси Такеҳиро Томиясу тез орада "Аякс"га кўчиб ўтиши мумкин.

Журналист Шоҳей Бабанинг хабарига кўра, Нидерландия клуби япониялик футболчи билан қишки трансферлар ойнасида мавсум охиригача қисқа муддатли шартнома имзолашни ва эҳтимол унга 2026 йил ёзида узоқ муддатли шартнома таклиф қилишни режалаштирмоқда. Ҳозирда томонлар тафсилотларни келишиб олишмоқда. Томиясу ҳозирда эркин агент.

У 2021 йилдан бери ўйнаб келаётган "Арсенал"ни ёзда тарк этди. Ўтган мавсумда 27 ёшли футболчи Англия Премьер-Лигасининг фақат битта ўйинида майдонга тушган. У мавсумнинг қолган қисмини тизза жароҳатидан тикланиш билан ўтказди.