SPORTS.uz Европа Лигасидаги плей-офф иштирокчилари ва уларнинг имкониятлари ҳақида фикр юритади.

Европада нуфузи борасида иккинчи ўринда турувчи ЕЛ тобора қизғин кўриниш олмоқда. Чорак финал иштирокчилари ўз рақибларини номини билиб олди. Унга кўра, бизни яқин кунлар ичида бир нечта ажойиб тўқнашувлар кутиб турибди. Бугун шу ҳақида атрофлича фикр юритамиз.

«Аякс» — «Рома» — 50% га 50%

- ЕЧЛ даражасидаги ўйин. Сўнгги 4 йил ичида бу жамоаларнинг иккиси ҳам Европа чемпионлар лигаси ярим финалида тўп сурган.

- Италия ва Голландия жамоалари ўртасидаги ягона баҳс 2003 йилда ЕЧЛда бўлиб ўтган. Амстердамда меҳмонлар 2:1 натижаси билан ғалаба қозонган бўлса, Римда томонлар муроса кўчасини танлаган. Голларни Батистута, Литманен, Кассано ва Ибраҳимович киритган.

Европа Лигасини безаб бериши тахмин қилинган ўйин. Эрик Тен Хаг ва Пауло Фонсеканинг шогирдлари томошабоп футбол намойиш этишни хуш кўради. Улардан бирини ғолиблик учун асосий даъвогар сифатида кўрсатиб бўлмайди. Ушбу классик жуфтликда ғолиб бўлган клуб катта эҳтимол билан ярим финалда инглиз жамоаси билан тўқнаш келади.

«Гранада» — «Манчестер Юнайтед» — 25% га 75%

- Испаниянинг ўртамиёна жамоаси Англиянинг энг бой тарихга эга клубига қарши майдонга чиқиб келиши лозим. «Гранада»нинг умумий қиймати 110 миллион евро. «Қизил иблислар» бугунги кунда 720 миллион еврога баҳоланади. Ушбу сумманинг ўзиёқ яққол фаворит ким эканлигидан далолат.

- Бу мавсумда «Гранада» плей-офф ўйинларида «Молде»ни доғда қолдирди. Уле-Гуннар Сулшер Манчестерга кўчиб ўтишдан аввал, айнан Норвегия чемпионини бошқарган эди.

«МЮ» бу ерга етиб келишдан аввал, «Милан» ва «Реал Сосьедад» тўсиғидан ўтди. Чорак финалда эса, нисбатан кучсизроқ жамоа билан тўқнаш келади. Шунга қарамай, Диего Мартинес жамоасидан эҳтиёт бўлиш лозим. Мураббий грандларга қарши «автобус» қўйишни яхши ўзлаштирган. «Гранада» ҳозирда тўп билан Испанияда энг кам муносабатда бўладиган клуб саналади. Бундан кўриниб турибдики, жамоа рақибдан келиб чиқиб ўз ўйинини қуради. Агар «қизил иблислар» тезда ўз классини намойиш этмаса, воқеалар ривожи кутилмаган томонга бурилиб кетиши ҳеч гап эмас.

«Арсенал» — «Славия» — 60% га 40%

- Эътиборлиси шундаки, «Славия» «Рейнжерс» ва «Лестер»ни меҳмонда 2:0 ҳисобида мағлубиятга учратиб, шу ерга қадар етиб келди. Клуб ўз ўйинини намойиш этса, Лондонда ҳам бу анъанани давом эттириши ҳеч гап эмас.

- Чехия клуби сўнгги бор «Арсенал» билан 2007/08 йилги мавсумда тўқнаш келган. «Кононирлар» ўз уйида Прагадан келган меҳмонларни жавобсиз 7 гол билан сийлаб юборган эди. Жавоб учрашувида эса, томонлар нурсиз дурангга имзо чеккан.

«Арсенал» «Бенфика» ва «Олимпиякос»ни турнирдан чиқариб юборди. Артета бошчилигида ҳақиқий кубок жамоасига айланиб бораётган «кононирлар»ни олдинда осон бўлмаган рақиб кутиб турибди. «Славия» жорий мавсумда катта клубларни енгишни ўрганиб олди. АПЛда 3-поғонада кетаётган «Лестер» ёки мағлубият нималигини билмай келаётган «Рейнжерс» ҳам «Славия»га дош бера олмади. Катта эҳтимол билан, «Арсенал» кўп тер тўкишига мажбур бўлади.

«Динамо» (Загреб) — «Вильярреал» — 45% га 55%

- «Вильярреал»ни 3 карра ЕЛ ғолиби – Унай Эмири бошқариб бормоқда. Испаниялик мутахассис шунингдек УЕФА кубогида ҳам зафар қучган.

- Загреблик футболчилар Европа Лигасидаги энг кутилмаган натижани қайд этишди. Лондондаги 2:0 дан сўнг, «Динамо» ўз уйида «Тоттенҳем»ни 3:0 ҳисобида мағлубиятга учратди. Мислав Орчиш хет-трик қайд этгач, бир кунда Хорватиядаги энг машҳур футболчига айланди.

Испанияликлар бу жуфтликда фаворитдек кўрингани билан, вазият ўзгариб кетиши ҳеч гап эмас. «Динамо» «шпорлар»га қарши ўйинда ўз даражасини кўрсатиб қўйди. Унай Эмири рақибни яхшилаб ўрганиб чиқиши аниқ. Улардан қай бири ярим финал йўлланмасига эга бўлишини олдиндан тахмин қилиш жуда ҳам мураккаб иш.

Ярим финалда кимлар тўқнаш келади?

«Гранада»/«Манчестер Юнайтед» vs «Аякс»/«Рома»
«Динамо З»/«Вильярреал» vs «Арсенал»/«Славия»

ЕЧЛдаги қуръа саватчаси сингари бу ерда ҳам бир томонда кучлироқ клублар жам бўлган. «Аякс», «Рома» ва «МЮ» финал учун асосий даъвогар. Нариги томонда «Арсенал» ва «Вильярреал» ҳал қилувчи ўйинга йўл олиш истагида. Уларга камтарин «Славия» ва «Динамо» қаршилик кўрсатишга уриниб кўради. Катта эҳтимол билан, инглизча финалга гувоҳ бўлишимиз мумкин. «Манчестер Юнайтед» – «Арсенал»! Эшитилиши қулоққа ёқимли, аммо бу шунчаки тахмин. Сизнингча, Европа Лигаси финалида қайси клублар ўзаро тўқнаш келади?