Ayb Fayzullaevdami?

Rossiya chempionatida TsSKA ketma-ket ikkinchi mavsum o‘rtamiyona jamoa darajasidan ko‘tarila olmayapti.  Avvalgi bosh murabbiy Vladimir Fedotovni o‘rniga serbiyalik mutaxassis Marko Nikolich olib kelingani ham hech qanday samara bergani yo‘q.

Premer-ligada “armiyachilar” dastlabki beshta bahsdan uchtasida ochko yo‘qotib bo‘ldi. Ayniqsa, ketma-ket ikki mag‘lubiyat ancha alamli bo‘ldi.

Rossiya futbolini yoritib borayotgan football24.ru sayti tahliliy maqolada TsSKAning muvaffaqiyatsizliklari sabablaridan biri Abbosbek Fayzullaevning o‘yinida pasaysh kuzatilayotgani bilan bog‘lik ekanini yozdi.

Hozir shu haqda.

- O‘tgan mavsumning birinchi davrasida TsSKAda Fyodor Chalov va Abbosbek Fayzullaev tandemi shov shuv ko‘tardi. Hozir ular yo‘q: Fyodor ketdi, O‘zbekiston terma jamoasi etakchisi shaxsiy krizisni boshdan kechirmoqda.

Bu mavsum TsSKA hujum chizig‘i uchun transferni cho‘zgani yo‘q. O‘z ishini ustasi hisoblangan to‘purar Seku Koytani olib kelishdi, lekin natija qo‘rqinchi – u hali birorta samara keltira olmadi. Malilik futbolchi faqat o‘yin oxirida imkoniyatlari cheklangan forvard Tamerlan Musaevning o‘rniga maydonga tushishga yarayapti xolos.  Afrikalik o‘yinchidan ko‘proq narsa – o‘yinda natijani ta’minlash kutilgandi, u esa, o‘zini ijtimoiy tarmoqlarda ko‘rsatmoqda va tez orada uning obunachilari milliontaga etadi. Boshqa natijaning o‘zi yo‘q.

Muhim uchrashuvlarda yana bir legioner Viktor Daviladan ham biror manfaat bo‘lgani yo‘q. Rifat Jemaletdinovning transferi shubhalar ostida qolmoqda: “Lokomotiv” safida bir yil o‘ynamagan futbolchini erkin agent maqomida tarkibga qo‘shib olishdi. Hozir TsSKAning bori shu.

Abbosbek Fayzullaev o‘tgan mavsumda chempionatda 15 ta samarali harakatni amalga oshirgan edi. Bunday sermahsullikni yo‘qotish, jamoani jarga etaklaydi. O‘zbek futbolchisining krizisni boshdan o‘tkazayotganini raqamlar bilan isbotlash mumkin. Fayzullaev ketma-ket 12 ta uchrashuvda samarali natija qayd etgani yo‘q. Bunga O‘zbekiston terma jamoasi tarkibida Olimpiadada ham muvaffaqiyatsiz o‘ynaganini qo‘shish mumkin. Demak, gap faqat TsSKAda emas.

Fayzullaevni nozik tarzda tushunib o‘ynaydigan sherigini sotib yuborishdi. Endi u Musaev va Jemaletdinov bilan hamkorlikda o‘ynashni yo‘lga qo‘yishi kerak. Shuningdek, qanotdagi hududlarini bu pozitsiyani egallay boshlagan Danil Krugovoyga bo‘shatib berishi talab etiladi, - deyiladi football24.ru sayti ekspertlari tahlilida.

Shu o‘rinda ta’kidlash lozimki, dunyoda hech bir futbolchi muntazam yuqori sport formasida bo‘la olmaydi. Hatto Lionel Messi, Krishtianu Ronaldu, Kilian Mbappe singari jahon yulduzlari o‘yinida ham past-baland holatlar kuzatilishi tabiiy hol.

Abbosbek Fayzullaev ham bundan mustasno emas. O‘tgan mavsumning ikkinchi yarmida ham legionerimiz o‘yinida qisqa muddatli pasayish kuzatilgan edi. Lekin 20 yoshli futbolchi tezda o‘zini o‘nglab oldi.

Bir tomondan o‘z oldiga katta maqsadlarni qo‘yadigan TsSKAdek jamoaning o‘yini Abbosbek Fayzullaevga bog‘liqligi, bu legionerimiz “armiyachilar” safidagi asosiy figuralardan ekanini yaqqol isboti ekani o‘zbekistonlik futbol ishqibozlari uchun yoqimli holat, albatta.   

Fayzullaevning o‘zi ham hozirgi vaziyatni juda yaxshi his qilib turibdi, deyish mumkin. Hamyurtimiz yaqinda jurnalistlarga fikr bildirib, tezkorlik va texnikasi o‘zining ustunligi ekaniga qaramay, hujumlarni samarali yakunlash xususiyati oqsayotganini tan oldi va bu kamchilikni yo‘qotish ustida ishlayotganini ta’kidladi.

Demak, bo‘lajak o‘yinlarda Abbosbek Fayzullaev bu murakkab vaziyatdan qanday chiqishini kuzatib boramiz...