Азим Аҳмедов: Мухлисларни хурсанд этишда давом этамиз

Хабарингиз бор кеча Суперлиганинг 5-турида “Навбаҳор” Фарғонада “Сурхон”ни қабул қилди ва 3:0 ҳисобида ғалаба қозонди.

Учрашувдан сўнг, “лочинлар” таркибида энг яхши футболчи деб топилган ярим ҳимоячи Азим Аҳмедов ўзининг ўйин ҳақидаги фикрларини билдириб ўтди.

"Мазкур учрашувга пухта тайёргарлик кўргандик. Боиси, ушбу баҳсдаги ғалаба биз учун жуда муҳим эди. Хайрият, ўз ниятимизга етиб, йирик ҳисобда зафар қучишга муваффақ бўлдик. Бугун бизни қўллаб-қувватлаб турган мухлисларга жамоамиз номидан ўз миннатдорчилигимни билдираман. Бугунги ғалабани автоҳалокатда вафот этган жамоамиз мухлисларига бағишлаймиз.

Ўйинимизда анча ижобий ўзгариш сезилди. Бундан буёғига ҳам ижобий натижага эришиб, мухлисларни хурсанд этишда давом этамиз.

Жамоамиз таркибидан кўплаб янги футболчилар ўрин олишган. Шу сабабли, ўйин амалиётига эга бўлиш учун бироз вақт керак эди. Бу эса жорий мавсумнинг илк баҳсларида ўз таъсирини кўрсатди. Мана энди жамоавий ўйин шаклланди ва бу муваффақиятимизда муҳим роль ўйнамоқда", - дейди Аҳмедов.

“Навбаҳор” ПФК матбуот хизмати.