Баҳодир, эҳтиёт бўл! Жалоловга Олимпиадада энг хавфли янги нокаутчи рақиб чиқди

Франция пойтахти мезбонлик қилаётган ёзги Олимпия ўйинларида ўзбекистонлик спорт ишқибозлари бокс мусобақаларини ҳам алоҳида эътибор билан кузатиб боради.

Чунки ўзбек бокс мактаби бугунги кунда дунёда энг етакчилардан ҳисобланади ва ҳамюртларимиз ҳар қандай мусобақада ғолибликка асосий даъвогарлар сифатида эътироф этиб келинмоқда.

Париж Олимпиадасида Ўзбекистон терма жамоаси тўлиқ таркиб билан қатнашади. Хусусан, эркаклар ўртасидаги мусобақаларда Ҳасанбой Дўсматов (-51 кг), Абдумалик Халаков (-57 кг), Руслан Абдуллаев (-63,5 кг), Асадхўжа Мўйдинхўжаев (-71 кг), Тўрабек Ҳабибуллаев (-80 кг), Лазизбек Мулложонов (-92 кг), Баҳодир Жалолов (+92 кг) рингга кўтарилади.

Хотин-қизлар баҳсида Сабина Бобоқулова (-50 кг), Нигина Ўктамова (-54 кг), Ситора Турдибекова (-57 кг), Навбаҳор Ҳамидова (-66 кг) юртимиз шарафини ҳимоя қилади.

Барча яккакураш турлари каби боксда ҳам энг кескин ва томошабоп жанглар ўта оғир вазн тоифасида кузатилади. Бу вазнда амалдаги жаҳон чемпиони ва Олимпия ўйинлари ғолиби Баҳодир Жалолов Парижда ҳам асосий фаворит сифатида тан олинмоқда.

Аксарият экспертлар Париж рингларида Баҳодир Жалолов ва қозоғистонлик Қамшибек Кункабаевнинг олтин медаль учун ўзаро рақобатини тахмин қилмоқда.

Кейинги йилларда бу икки паҳлавон ўртасидаги тўқнашувлар бокс “класико”си таърифини олган. Ҳозирча, улар ўртасидаги ўнта жангда умумий ғалабалар сони бўйича Баҳодир устун – 7:3.

Британиялик машҳур журналист Тейлор О’Хиггинс Баҳодир Жалоловни фаворит сифатида таърифлар экан, ўзбек боксчиси учун энг хавфли рақиб Қамшибек Кункабаев, деган фикрга қўшилмади.

- Мени ҳайрон қолдираётгани шуки,  фаолиятидаги энг зўр даврларини ўтказиб бўлган Қамшибек Кункабаев Теремоана Жуниор олдида фаворит сифатида кўрилаётганидир.

Менинг фикримча, австралиялик боксчи олимпия чемпионлиги учун курашда Баҳодир Жалоловга  энг хавфли рақиб ҳисобланади.

Жалолов ва Теремоан мусобақанинг чорак финалида тўқнаш келиши кутилмоқда. Мен Жалоловни енгиш учун Теремоананинг Кункабаевга қараганда имконияти кўпроқ, - деб таъкидлади Тейлор О’Хиггинс.

Австралиялик 26 ёшли Теремоан Жуниор 2023 йили Тошкентда ўтказилган жаҳон чемпионатида Баҳодир Жалолов билан бир марта жанг қилган. Уч раундли беллашувнинг иккинчи раундида рақиб муддатидан олдин таслим этилганди.Британиялик журналист австралиялик боксчининг имкониятларини юқори баҳолаётгани бежиз эмас, албатта. Тошкент рингларидаги мағлубият Теремоананинг ҳаваскор боксдаги фаолиятида охиргиси бўлиб турибди. Ундан кейин бу чарм қўлқоп устаси кетма-кет 13 та жангда зафар қучди. Эътиборли жиҳати шундаки, Теремоана Жуниор бу баҳсларнинг ўнтасида кучли ва тажрибали рақибларга тўқнаш келиб, уларнинг барчасида нокаут қайд этди.

Теремоана Жуниор худди Баҳодир Жалолов сингари профессионал йўналишда ҳам жанг ўтказмоқда. Ҳозирча, тўртта баҳсда қатнашиб, уларнинг барчасида рақибларини муддатидан олдин таслим қилган.

Жалоловнинг профессионал боксдаги тажрибаси ҳам анча катта. Кучли зарбага эга боксчимиз 14 та учрашувнинг ҳаммасини нокаут билан ўз фойдасига ҳал қилган.