Баҳром Ҳайдаров: "Биринчи бўлимда умуман яхши ўйнай олмадик"

“Қўқон-1912” – “Шўртан” (0:0) ўртасидаги учрашувдан кейинги матбуот анжуманида мезбонлар бош мураббийи Баҳром Ҳайдаров ўз фикрларини билдирдиб ўтди.

- Биринчи навбатда бундай об-ҳавога қарамасдан жамоамизни охиригача қўллаб-қувватлаган ишқибозларимизга раҳмат айтаман. Ўйинга келсак, биринчи бўлимда умуман яхши ўйнай олмадик. Танаффусда йигитлар ўзларига келишди. Улар билан гаплашдик, ўйиндан кейин ҳам гаплашдик ва яна албатта муҳокама қиламиз. “Настрой”га боғлиқми ёки бошқа сабаби борми, ҳали яна гаплашамиз. Иккинчи бўлимни алоҳида оладиган бўлсак, ғалаба қозонишимиз мумкин эди. Чунки 3-4 та имкониятимиз бўлди. Асосий вазиятлар бизда бўлди, ютишимиз керак эди. Уч очко сув ва ҳаводек зарур эди. Кейинги режаларимиз ва ўйинларимизга ғалаба жуда яхши таъсир қилиши керак эди. Дуранг ҳам яхши натижа. Бироқ уйда яхши таассурот қолдирмадик.

- Учта учрашувдан бери ҳужумчилар гол ура олмаяпти. Уларга эътирозингиз борми?

- Албатта, эътироз бўлади. Бу айнан ҳужумчиларга эмас, бутун жамоага тегишли. Гол уриш бўлмаяпти. Бу ҳақида гапиргим келмаяпти. Бу хусусида яна гаплашамиз. Бундан фожеа ясаш керак эмас. Қишки тайёргарлик пайтида Бешимов ҳам, Холтўраев ҳам, Кондратюк ҳам гол уриш қобилияти борлигини кўрсатишди. Ўйлайманки, улар ҳали кўп голлар уришади.

- Шота Гвазава майдонда кўриниш бермади...

- Гвазава асосий жароҳатидан қутулди. Лекин у ҳали спорт формасида эмас. Машғулотларга максимал даражада киришадиган бўлса, албатта имконият берилади. У икки ойдан бери югургани йўқ. Унга ҳали яқин 2-3 та учрашувда умид қилмаяпмиз.