Баҳром Ҳайдаров: "Кейинги учрашувларда ҳисобни сақлаб қоладиган жамоа бўлмаймиз"

Суперлиганинг 5-турида “Қўқон-1912” ўз майдонида “Бухоро”ни қабул қилди ва биринчи бўлимда Иқбол Маликжонов томонидан киритилган ягона гол мезбонларга уч очкони тақдим этди. Бу орқали қўқонликлар жорий мавсумдаги биринчи ғалабасини қўлга киритди. Учрашувдан сўнг матбуот анжуманида қўқонликлар устози Баҳром Ҳайдаров фикрлари билан ўртоқлашди.

- Мавсумдаги биринчи ғалаба билан мухлисларимизни, раҳбариятни табриклайман. Анча ёқимли ҳиссиёт. Бу ғалаба биринчи бўлмасин, бардавом бўлсин. Бу каби ғалабалар билан стадионимиз ҳам тўлади ва қизиқишни ҳам орттирамиз. Бевосита ўйинга келсак, биринчи бўлимни жуда яхши ўтказдик. Тайёргарлигимиз, комбинациямиз ўхшади. Биринчи навбатда йигитларга раҳмат айтаман. Албатта, ҳаяжон бўлди, чунки босим бор эди. 4 та турдан бери ғалабамиз йўқ эди. Ушбу босимдан ўтиб олдик. Бу футболчиларга ишонч келтиради ва кейинги учрашувларга мотивацияни оширади. Иккинчи бўлимга келсак, 1:0 бизникиларни бироз бўшаштирдими ёки қўрқув бўлдими, ўзгаришлар орқали ўйинни биз томонга ўтказишга ҳаракат қилдик. Лекин кутилмаган жароҳатлар боис ҳимояга ўтишимизга сабаб бўлди. Бу голга айланиши ҳам мумкин эди. Буни кўриб чиқамиз, бундай ҳолатлар юз бермаслиги керак. Биласизлар, 1:0 қалтис ҳисоб. Ўйлайманки, кейинги учрашувларда ҳисобни сақлаб қоладиган жамоа бўлмаймиз.

- Кейинги ўйинларда ҳам муҳим баҳслар кутяпти ва Ўзбекистон Кубогидаги иштирокини ҳам давом эттиради. Кубокдаги вазифа қандай?

- Бизда ажратиш йўқ. Бу Кубок бўладими ёки бошқасими, барчаси мамлакат даражасидаги футбол мусобақалари ҳисобланади. Суперлига ҳам, Кубок ҳам биз учун муҳим. Рақибга қараб ҳар бир футболчини ўйнатишимиз керак. Олдинги учрашувда ҳам ёшларга имконият бердик. Кўрдинглар, Кубок мусобақасида кутилмаган натижалар ҳам бўлади. Ўзбекистон Кубогидаги биринчи вазифамиз гуруҳдан чиқиш. Биз ҳеч бирини ажратмаймиз. Ҳар бир ўйинда ғалаба учун майдонга тушамиз. Кейинги турларга тайёргарлик ҳар доимгидек бўлади. Кундан-кунга қўшишимиз керак. Легионер ҳужумчимизга келсак, кўп жароҳат олганди. Режаларимиз бузилмаганда уни ўйин охирларида майдонга туширишни ўйлаб тургандик. Акрамовни жароҳати вазиятни ўзгартирди. Ўйлайманки, кейинги ўйинларда ўзларини кўрсатишади.

- Ўтган сафар қизил карточка олган футболчилар нечта ўйинга дисквалификация қилинди?

- Биз ҳам буни кутиб турибмиз. Ғофуров ҳам, Ҳасанов ҳам асосий таркиб футболчиларимиз. Ҳар бирини ўз ўрни бор. Биз ҳам кутяпмиз, ҳар ҳафта янгитдан режа қилавермайсиз-да, 3-4 та ўйин учун режамиз бўлади. Уларни ўйнатишимиз ёки алмаштиришимиз керак. Менимча, қўмита шу кунларда кўриб чиқади.

- Ўринбосарлар сафида Жасур Аҳмаджонов 7 та гол урди. Уни асосий таркибда майдонга тушириш режаси борми?

- Албатта. Уни бугунги ўйинда 20 талик қайдномага киргизиш режамиз ҳам бор эди. Биз билан икки-уч кундан бери машғулотда шуғулланди. Табиийки, Аҳмаджоновга ҳам имконият берилади. Мақсадимиз, ўзимизни маҳаллий ёшларни етиштириш ва уларни асосий жамоага жалб қилиш. Бизда тўсқинлик йўқ. Асосий таркибда шуғулланиб, рақобатда ютиб, асосий жамоада ўйнаса, муаммо йўқ. Кучлироқ бўлса ўйнайверади. Лекин ҳали ёш. Аста-секин унга ҳам албатта имкон берилади. Лекин бундай босим юқори учрашувда майдонга туширсангиз ўзини йўқотиб қўйиши мумкин. Аста-секин имконият берилади.