Бальде Англия клублари қизиқишига қарамай "Барселона"да қолмоқчи

Алехандро Бальде фаолиятини Англияда давом эттириши мумкин, бироқ ўзи "Барселона"да қолиш ниятида.

"Mundo Deportivo" маълумотига кўра, ҳимоячига "Манчестер Юнайтед", "Манчестер Сити" ва "Астон Вилла" жиддий қизиқиш билдирмоқда. Ҳозирча расмий таклифлар бўлмаган бўлса-да, инглиз клублари футболчини диққат билан кузатмоқда.

Шу билан бирга, Бальденинг ўзи Каталония клубини тарк этишни истамаяпти. Унинг агенти Жорже Мендеш ҳам футболчи "Барселона"да қолишни режалаштираётганини тасдиқлаган.

Маълумот учун, Бальде "Барселона" тарбияланувчиси ҳисобланади. Унинг клуб билан шартномаси 2028 йил 30 июнгача амал қилади.

Жорий мавсумда ҳимоячи 34 та ўйинда иштирок этиб, 3 та голли узатмага муаллифлик қилган.