Бальде "Барселона"дан кетиши мумкин: "Клуб уни сотишни истисно қилмаяпти"

Каталониянинг "Барселона" жамоаси ҳимоячиси Алехандро Бальде келажаги яна муҳокама марказида.

ОАВ маълумотларига кўра, аввалроқ клуб 22 ёшли латералга узоқ муддатли лойиҳа сифатида қараган бўлса-да, унинг ўйиндаги пасайиши ва тез-тез жароҳат олиши "кўк-анорранглилар"нинг позициясини ўзгартирган. Ҳозирги кунда клуб футболчини сотиш вариантини ҳам истисно қилмаяпти.

"Sport" нашри хабар беришича, Бальде ёзги трансфер ойнасида яхши таклиф тушса, жамоани тарк этиши мумкин.

Футболчининг ўзи эса юқори даражада ўйнашга қодир эканини исботлашни ва бош мураббий Ханс-Дитер Фликка асосий таркиб учун лойиқлигини кўрсатишни хоҳламоқда.

Transfermarkt портали унинг бозор қийматини 55 миллион евро деб баҳолаган. Бальденинг "Барселона" билан амалдаги шартномаси 2028 йилгача мўлжалланган.