Бақоевнинг матбуот анжуманида жаҳли чиқди

ОФК Кубоги ҳудудлараро финал босқичи доирасидаги "Сўғдиёна" - "Куала-Лумпур Сити" ўйини ниҳоясига етди. Унда меҳмонлар пенальтилар сериясида ғалабани илиб кетди, 5:3.

Ўйиннинг асосий вақтида ҳисоб очилмади. Қўшимча бўлимларда ҳам вазият ўзгармади. Футбол лотереясида эса "бўрилар" вакили Шаҳбоз Жўрабековнинг хатоси қимматга тушди.

Шу тариқа, малайзияликлар финал йўлланмасини қўлга киритди. Энди улар 22 октябрь куни Уммоннинг "Ал-Сибб" клуби билан беллашади.

Учрашувдан сўнг "бўрилар" бош мураббийи Улуғбек Бақоев иштирокида матбуот анжумани бўлиб ўтди. Қуйида унинг фикрлари билан танишиб чиқишингиз мумкин: 

- Тўғрисини айтсам, футболчилар режадагидек ва яхши ҳаракатланди. Якуний зарбаларда муаммоларга дуч келдик. Биз гол урмадик. "Куала Лумпур" ўйинни ҳис қилиб ўйнади ва навбат пенальтилар сериясига келди. Албатта, серия бу - лотерея. Йигитларнинг ҳаммасидан хурсандман. Ҳаёт давом этади.

- Ширинбой Абдуллаев "Қизилқум"га қарши ўйинда ҳам, ҳозир ҳам пенальти қайтармади. Балки, Митровичга имкон бериш керакмиди?

- Энди нимадир дейишга кеч. Биз машғулотларда буни режалаштиргандик. Бу юриш муваффақият олиб келишини кутгандик. Ширинбой ҳам тажрибали дарвозабон. Баъзан шундай бўлади. Ҳеч кимга эътирозим йўқ. Режамиз амалда иш бермади.

- Ўзгаришларни жуда кеч қилдингиз. Ваҳоланки, 90 дақиқанинг ўзида бу ишга қўл уриш мумкин эди.

- Биласизми, бугунги алмаштиришларимиз фақатгина жисмоний чарчоқ билан боғлиқ. Кимдир толиққан бўлса, унинг ўрнига бошқа футболчини туширдик. Бизда яхши имкониятлар бўлди. Умуман олганда, майдонда ажойиб ҳаракат қилдик.

- Жамоа ярим финалда тўхтади. Суперлигада ҳам курашдан чиқди. Бақоевнинг курсиси қимирлаб қолмадими?

- Саволингизни учрашувга алоқаси йўқ. Биз ўйинни муҳокама қиламизми ёки менинг келажагимними? Агар сиз келажагимни муҳокама қилмоқчи бўлсангиз, мендан интервью олинг. Ҳар бир мураббий келади, кетади. Барчаси раҳбариятга боғлиқ.

- Ярим финал ҳам у қадар ёмон натижа эмас. Саволга келсак, рақиб дарвозабонининг жисмоний ҳолати яхши эмасди. Нима учун узоқдан зарбалар бўлмади ёки пенальтилар сериясигача бориш жамоанинг режаларида бормиди? 

- Сизга миннатдорчилик билдирамиз. Жамоани яхши ва ёмон кунида қўллаб-қувватлаётганларга раҳмат айтаман. Ўйинга келсак, бизда пенальтигача бориш режаси йўқ эди. Рақиб посбони яхши ўйин кўрсатди. Якунловчи зарбаларимиз ўхшамади. Шу сабабли, учрашув пенальтигача борди. Режаларимиз агрессив ва фаол қанотлар билан ҳаракат қилиш керак эди. Пенальти бу 50 га 50. Унда ким ютишини билиб бўлмайди. 


Фикрлар

Фикр қолдириш учун авторизациядан ўтинг!
Akram Haedarov
05/10/2022 22:14
9-da blaknotcha bilan kelsin qarshiga baqoy tog'a Ro'ziqul akadan dars olib ketadi faqat maskani yechib kelsin qarshiga