“Барса” Диасни эмас, Салоҳни оладиган бўляпти. Қарор нега ўзгарди?

“Барселона” ёзги трансферлар даврида таркибда жиддий ўзгаришлар қилишни режалаштирмоқда.

Footmercato нашрига кўра, каталонияликлар ҳужум чизиғига “Ливерпуль”нинг икки вакили – Луис Диас ва Муҳаммад Салоҳдан бири таклиф қилмоқчи.

Клуб спорт директори Деку бу ўринга Луис Диасни танлаган эди. Португалиялик мутахассис Диас “Барселона” ўйин услубига тўлиқ мос тушади, деган хулосага келган.

Бироқ кейинги пайтда танлов Муҳаммад Салоҳ томонига оғмоқда. Бу клубнинг молиявий аҳволи билан боғлиқ. Мисрлик юлдузнинг ёзда эркин агентга айланиши каталонияликларга уни бепул қўлга киритиш имконини беради.

Манбанинг таъкидлашича, “Барселона” ҳар икки ўйинчини бирданига жамоага олиб келолмайди ва шунинг учун улардан бирини танлаши талаб этилади.