“Барса” иккита катта трансферга тайёрланяпти

“Барселона” хўжайини Жоан Лапорта ва спорт директори Деку жорий мавсум якунланганидан кейин таркибни кучайтириш учун катта харидларни амалга оширмоқчи.

Маълумотларга қараганда, клуб раҳбарияти жамоага “Байер” ҳимоячиси Жонатан Та ва “Атлетик Бильбао” юлдузи Нико Уильямсни олиб келишни режалаштирган.

Жонатан Танинг леверкузенликлар билан амалдаги шартномаси ёзда тугайди. Тажрибали ҳимоячининг ўзи “Байер”ни тарк этишга қарор қилган.

Каталонияликлар ёзда таркибдаги икки ҳимоячи – Андреас Кристенсен ва Рональд Араухони сотиб юборишни кўзлаяпти. Жонатан Та бу ўйинчилар ўрнини босиши талаб қилинади.

Нико Уильямс эса, “Барселона” орзусидаги футболчи. Каталонияликлар уни ёзда ҳам трансфер қилишга уриниб кўрган эди. Бироқ Нико Бильбаода қолишни маъқул топди.

Уильямснинг “Атлетик” билан шартномаси 2027 йилнинг ёзигача давом этади. Шу боис уни олмоқчи бўлган клублар 60 миллион евродан кўпроқ маблағ тўлаши керак.