“Барса” катта трансферга улгуриб қолмоқчи

Испаниянинг амалдаги чемпиони “Барселона” ёзги трансферлар ойнаси ёпилиши арафасида  қимматбаҳо чиқиш трансферини амалга оширишга улгурмоқчи.

Сўнгги маълумотларга қараганда, каталонияликлар ҳужумкор футболчи Фермин Лопесни сотишга қарор қилди. Аввалига, клуб мутасаддилари бу ўйинчини жамоада олиб қолишни маъқул кўрганди.

 Mundo Depоrtivo нашрига кўра, энди вазият ўзгарди. “Барселона” ўйинчига харидор бўлган “Челси”дан таклиф кутмоқда. Агар “аристократлар” Фермин учун 70 миллион евродан кам бўлмаган сумма тўлашга рози бўлса, иқтидорли ярим ҳимоячи Англия Премьер-лигасига кўчиб ўтади.

Аслида Transfermarkt портали 22 ёшли футболчини 50 миллион еврога баҳоланган. Лопеснинг каталонияликлар билан шартномаси 2029 йилнинг ёзигача давом этиши белгиланган.