“Барса” Ўзбекистон рақибидан икки футболчи олади
Кетма-кет иккинчи йили Испания чемпионлигини қўлга киритишга яқин турган “Барселона” клуби келаси мавсум олдидан таркибини кучайтиришга эътибор қаратмоқда.
Каталония клуби нишонига икки нафар португалиялик футболчи тушган.
Mundo Deportivo нашри маълумотига кўра, Каталония клуби “Манчестер Сити”нинг 31 ёшли ярим ҳимоячиси Бернарду Силва ва “Челси”нинг 26 ёшли ҳужумкор футболчиси Педру Нетуни ўз таркибига қўшиб олиш имконини кўриб чиқмоқда.
Каталонияликлар бу икки ўйинчини ёзда таркибга қўшиш орқали жамоанинг ҳужумкорлик салоҳиятини кўтаришни мўлжаллаяпти.
Бернарду Силва Манчестердан кетишини анча олдин эълон қилган ва “Барселона”га ўтишга мойиллигини билдирган. Каталония клуби машҳур юлдузни эркин агент мақомида бепул қўлга киритиши мумкин.
Transfermarkt портали томонидан 60 миллион евро деб баҳоланган Нету эса “Челси” жорий мавсум якунида Чемпионлар лигасига чиқа олмаса, кетиш ҳақида ўйлаб кўришини билдирган. Катта эҳтимол билан “Челси” бу гал қитъанинг энг нуфузли мусобақасига йўлланма ололмайди. Жамоада инқироз бошланган ва бош мураббий Лиам Росеньор ишдан олинган.
Таъкидлаш жоизки, Бернарду Силва ҳам, Педру Нету ҳам Португалия терма жамоаси аъзолари ҳисобланади. Португалияликлар 2026 йилги жаҳон чемпионатининг гуруҳ босқичида Ўзбекистон миллий терма жамоаси билан куч синашади.
Бернарду Силва эса айни пайтда ўзбек легионери Абдуқодир Ҳусанов билан бирга “Манчестер Сити”ни Англия Премьер-лигасидаги чемпионлигини таъминлаш учун курашмоқда.
Жаҳон чемпионати доирасида Португалия ва Ўзбекистон миллий терма жамоаларининг ўзаро учрашуви гуруҳ босқичининг иккинчи турида – 26 июнь куни АҚШнинг Хьюстон шаҳрида бўлиб ўтиши белгиланган.
“К” гуруҳида бу икки терма жамоадан ташқари Колумбия ва Конго Демократик Республикаси футболчилари ҳам ўйнайди.
Фикрлар