У мени ютади! Машҳур ҳужумчи Ҳусановнинг зўрлигини тан олди
Ўзбекистон миллий терма жамоаси марказий ҳимоячиси Абдуқодир Ҳусанов ўзининг алоҳида хусусиятлари билан мухлису мутахассислар эътиборини қозониб келмоқда.
22 ёшли легионеримиз Англия Премьер-лигасининг энг тезкор футболчиларидан бири ҳисобланади. Европа Чемпионлар лигасида ҳам Ҳусанов энг катта тезлик намойиш этган футболчи сифатида тан олинган.
Англиялик юлдузлар “Манчестер Сити”да энг тезкор ўйинчи кимлигини аниқлаш мақсадида жамоа ҳужумкор футболчиси Жереми Докудан шу масалага ойдинлик киритишини сўради.
- Энг тезкори Ҳусанов. Ҳамма унинг қанчалик тез эканини билади. Менимча, 15 метр масофада устунлик мен томондан. Бу борада ўзимга ишонаман. Аммо 40 метр масофага югуришда Абдуқодир ютади, деб ўйлайман, - деди Жереми Доку The Telegraph нашрига берган интервьюсида.
Таъкидлаш жоизки, англиялик журналистлар бир муддат олдин худди шу саволни Абдуқодир Ҳусановга ҳам берган. Ўшанда ўзбек футболчиси камтарлик қилиб, Жереми Доку ўзидан тезкор эканини айтган.
Таъкидлаш жоизки, ҳар икки футболчи “Манчестер Сити”нинг жорий мавсумдаги муваффақиятларига жуда катта таъсир ўтказиб келмоқда. Абдуқодир Ҳусанов ҳимоя чизиғининг асосий таянчига айланди.
Ўзбек футболчиси Англия Премьер-лигаси, мамлакат кубоги ва Лига кубогида, шунингдек, Европа Чемпионлар лигасида жами 33 маротаба майдонга тушди. Шу ўйинлардан аксариятини бошланғич таркибда бошлади ва тўлиқ ўйнади.
23 ёшли Жереми Доку ҳам асосий таркибнинг муқим ва муҳим ўйинчисига айланган. Бельгиялик вингер барча мусобақаларда 40 та учрашув ўтказиб, рақблар дарвозасини 4 маротаба ишғол қилди ва жамоадошларига 13 марта голли пас узатди.
Таъкидлаш лозимки, Абдуқодир Ҳусанов ва Жереми Доку жорий мавсум тугаши билан ўз мамлакатлари миллий терма жамоалари сафида АҚШ, Канада ва Мексикада бўладиган жаҳон чемпионатида иштирок этади.
“К” гуруҳидан жой олган Ўзбекистон квартетдан чиқиш учун Португалия, Колумбия ва Конго Демократик Республикаси билан рақобатлашади.
Бельгия терма жамоаси эса, Жереми Доку ёрдамида Миср, Эрон ва Янги Зеландия ўрин олган “G” гуруҳидан плей-оффга йўлланма олиш учун курашади.
Фикрлар