“Барса”да катта тозалаш бошланди: Бирортаси керак эмас!

Испания чемпионлигини қўлга киритган “Барселона” бош мураббийи Ханс-Дитер Флик келаси мавсум олдидан жамоа таркибида жиддий ўзгаришлар қилишга бел боғлади.

Таъкидлаш жоизки, клуб раҳбарияти Ла Лиганинг молиявий фэйр-плейи қоидаларини бузмаслик учун қатъий чоралар кўришга мажбур бўлмоқда.

Мутасаддилари бош мураббий Флик сўраган янги ижрочиларни олиб келиш учун таркибда уларга жой очиши, маошлар фондини қисқартириши ва трансферлардан тушум қилиши талаб этилади.

Mundo Deportivo нашрининг маълум қилишича, каталонияликлар камида етти нафар футболчи билан хайрлашадиган бўляпти. Унга кўра, Марк-Андре тер Штеген, Пабло Торре, Иньяки Пенья, Ориоль Ромеу, Пау Виктор, Андреас Кристенсен ва Ансу Фати кетадиганлар рўйхатига киритилган.

Бу ўйинчилар орасида Марк-Андре тер Штеген клубда қолиб, асосий дарвозабон позициясини яна ўзига қайтариб олмоқчи.

Бундан ташқари, Рональд Араухонинг Каталониядаги келажаги мавҳум бўлиб турибди. “Барселона” агар яхши таклиф тушса, уругвайлик марказий ҳимоячини қўйиб юборишга розилигини билдирган.