“Барса”да нима бор, бизга кел! Европанинг машҳур клуби Левандовскини чақирди

“Барселона” жорий мавсум охирида польшалик тўпурар Роберт Левандовски билан хайрлашадиган бўлган. Испаниянинг амалдаги чемпиони бўлган жамоа бош мураббий Ханс-Дитер Флик 37 ёшли ҳужумчининг самарадорлиги тушиб кетганидан норози.

Левандовскига қизиқиш билдириб келаётган Саудия Арабистони клублари ҳужумчини ўз сафига таклиф эта бошлади. Роберт бу чорловларни қабул қилгани йўқ. У ҳали Европада ўйнаш истаги борлигини яшираётгани йўқ.

Польшалик тўпурарга бу имкониятни “Милан” яратиб бермоқчи. Миланликлар спорт директори Игли Таре футболчининг агентлари билан алоқа ўрнатди.

Манбанинг таъкидлашича, “Милан” Роберт Левандовскининг 13 миллион евро миқдоридаги йиллик маошини тўлашга қийналади. Агар тўпурар бу жамоага ўтадиган бўлса, маош талабини пасайтириши кераклиги айтилмоқда.