“Барса”нинг “юлдузчалари” бошимни оғритиб ташлади

Испаниянинг амалдаги чемпиони “Барселона”да муҳим аҳамиятга эга бўлган ҳимоячи Жюль Кунде жамоанинг ёш ўйинчилари ҳақида фикр билдирди.

Маълумки, Ханс-Дитер Флик Каталония клубига келганидан кейин таркибда ёш ўйинчилар бўлишига алоҳида эътибор қаратиб кетмоқда. Жамоанинг муваффақиятларини бу футболчиларсиз тасаввур қилиб бўлмайди.

26 ёшли ҳимоячи Жюль Кунде ҳам бу борада ўз фикрларини айтди.

- Кийим алмаштириш хонасида ёш футболчиларимиз ўзини боладек тутади. Улар шу даражада шовқин соладики, бошим оғрий бошлайди, - деди Жюль Кунде.

Франциялик ҳимоячининг ўзи яқинда “Барселона” билан шартномасини янгилади. Янги келишувга кўра, Кунде 2030 йилнинг 30 июнига қадар Каталония суперклубида тўп тепади.