"Барселона" ҳимоячиси қуролли ҳужум натижасида вафот этди

Эквадорнинг "Барселона" клуби ҳимоячиси Марио Пинейда ўзига қилинган ҳужумдан сўнг 34 ёшида вафот этди. Бу ҳақда клуб матбуот хизмати ижтимоий тармоқларда хабар бермоқда. Эквадор оммавий ахборот воситаларининг таъкидлашича, футболчи билан бирга унинг турмуш ўртоғи ҳам ҳалок бўлган. Марионинг онаси жароҳат олган.

Пинейда 2016 йилдан бери "Барселона" футболчиси эди. Клуб билан биргаликда у икки марта Эквадор чемпионлигини қўлга киритган, шунингдек, мамлакат кубоги соҳибига айланган. Марио футболчилик фаолияти давомида Эквадорнинг "Индепендьенте дель Валье", Бразилиянинг "Флуминенсе" клубларида ўйнаган.

2015 йилнинг ёзида Пинайда Чилида бўлиб ўтган Америка кубогида иштирок этди. Турнирда у захирада бўлди ва бир дақиқа ҳам ўйнамади.