«Барселона» қишда Кундени сотишга тайёр

«Барселона» раҳбарияти қишки трансфер ойнасида жамоа таркибида катта ўзгаришлар қилишга тайёр. Каталония клуби француз ҳимоячиси Жюль Кундени сотиш имкониятини кўриб чиқмоқда.

Sport.es нашри хабарига кўра, 27 ёшли футболчи яқиндаёқ жамоани тарк этиши мумкин. Унинг ўрнига «Барселона» Лиссабоннинг «Спортинг» клуби таркибида тўп суриб келаётган ёш ҳимоячи Иван Фреснедуни олиб келишни режалаштирмоқда. Жамоанинг ўнг қанотини кучайтириш бўйича якуний қарорни клубнинг спорт директори Деку қабул қилади.

Маълумот учун, Жюль Кунде «Барселона» сафида 2022 йилдан бери ўйнаб келмоқда. Унга қадар футболчи «Севилья» ва «Бордо» клубларида ҳаракат қилган. Жорий мавсумда француз ҳимоячиси Ла Лигада «кўк-анорранглилар» таркибида бор-йўғи тўртта ўйинда майдонга тушди. Ҳозирги пайтда «Барселона» Испания чемпионати жадвалида пешқадамлик қилмоқда.