“Barselona” tarixidagi eng zo‘r futbolchi aniqlandi. U Messi emas!

The Mirror nashri “Barselona” tarixidagi eng zo‘r futbolchini aniqlash uchun o‘tkazilgan so‘rovnoma natijalarini e’lon qildi.

Unga ko‘ra, birinchi o‘ringa argentinalik futbol yulduzi Diego Maradona loyiq topildi. Ikkinchi o‘rindan Maradonaning hamyurti va “Barsa”ning hozirgi etakchisi Lionel Messi o‘rin oldi. Kuchli uchlikni braziliyalik “afsungar” Ronaldino egalladi.

Qizig‘i shundaki, Maradona 1982-1984 yillar davomida kataloniyaliklar tarkibida atigi 36 ta uchrashuv o‘tkazib, raqiblar darvozasiga 22 ta to‘p kiritgan. Shu vaqt mobaynida Ispaniya kubogi, Liga kubogi va Superkubok sohibi bo‘lgan.

Butun faoliyatini “Barselona”da o‘tkazayotgan Lionel Messi esa rasmiy uchrashuvlarda 768 ta o‘yin o‘tkazib, 663 ta gol urgan va jamoasi bilan klublar miqyosidagi barcha turnirlarda bir necha marotabadan g‘olib bo‘lgan. Hatto olti marta “Oltin to‘p”ga ega chiqqan.

Maradonaning sovrinlar bobida Messidan yagona ustunligi 1986 yili jahon chempionligini qo‘lga kiritganida.   

Ronaldino esa “Barselona”dagi faoliyati davomida barcha turnirlarda 214 ta uchrashuv o‘tkazib, raqiblar darvozasini 94 marotaba ishg‘ol qilgan. Ikki karra Ispaniya chempioni, Superkubok sohibi va Evropa Chempionlar ligasi g‘olibligiga sazovor bo‘lgan.  

“Barsa” tarixidagi eng kuchli o‘yinchilar reytingi quyidagicha ko‘rinish oldi.

1. Diego Maradona

2. Lionel Messi

3. Ronaldino

4. Ioxan Kroyff

5. Andres Inesta

6. Xavi

7. Luis Suares

8. Ronaldo

9. Jerar Pike

10. Karles Puyol