"Барселона" ёш ярим ҳимоячисини Ла Лига рўйхатидан ўтказди

18 ёшли ярим ҳимоячи Марк Берналь расман "Барселона" асосий жамоасининг жорий мавсум қайдномасига киритилди.

Ўтган мавсум бошида Каталония жамоаси тарбияланувчиси "кўк-анорранглилар"нинг асосий таркибига кескин ёриб кирди, аммо тиззасининг хочсимон бойламларини йиртилиб, узоқ муддатга сафдан чиққан эди. Берналь сўнгги бор 2024 йилнинг августида Испания чемпионатининг 3-туридан ўрин олган "Райо Валекано"га (2:1) қарши ўйинда майдонга тушганди.

Умуман олганда, Берналь катталар жамоаси сафида учта ўйинда майдонга тушган, бироқ гол ёки голли узатма амалга оширмаган эди.

14 сентябрь куни Ханс-Дитер Флик шогирдлари ўз майдонида "Валенсия"ни қабул қилади. Ла Лиганинг 4-тур ўйинлари Тошкент вақти билан соат 00:00да бошланиши режалаштирилган.