“Барселона”да жароҳатлар сонини қисқартириш учун янги тизим жорий этилди

Каталониянинг “Барселона” клуби жамоада янги жароҳатларнинг олдини олиш учун қўшимча чоралар кўрмоқда. Журналист Ферран Мартинеснинг хабар беришича, бош мураббий Ханс-Дитер Флик ҳар бир футболчининг юкламаси ва жисмоний ҳолатига қараб индивидуал машғулот режасини тузмоқда.

Маълумотларга кўра, шу ҳафта Маркус Рэшфорд, Жюль Кунде, Френки де Йонг ва Пау Кубарси индивидуал дам олиш куни олган. Айнан шу футболчилар сўнгги ҳафталарда энг кўп дақиқа майдонда ҳаракат қилган.

Эслатиб ўтамиз, ўтган якшанба куни “Барселона” “Эл-класико”да “Реал Мадрид”га 2:1 ҳисобида мағлуб бўлган эди. Жамоа навбатдаги ўйинни 2 ноябрь куни ўз майдонида “Эльче”га қарши ўтказади.