"Барселона"нинг янги лидерига айланиб бораётган Рафинья

2022 йили ёзги трансферлар ойнасида "Барселона" яхшигина активлик намойиш қилганди. Ўша пайтда жамоа "Лидс"дан бошқа топ клублар нисбатан қулайроқ таклиф билан чиққан Рафиньяни қўлга киритади. Бунда футболчининг клубда ўйнаш истаги ва раҳбариятнинг тўғри ишлаши орқали вингер каталонияликлар сафига келиб қўшилади. Кейинги йилларда бразилияликнинг бир неча бор сотилиши мумкинлиги борасида хабарлар чиқди, лекин футболчи қолишни танлади. Айниқса, Ламин Ямалнинг дўсти ўтган мавсумни ва Еврони "ёндирган"идан кейин Рафинья керакмас деганлар ҳам бўлди. Аммо бугунги кунда у жамоа капитани сифатида майдонда ҳаракатланмоқда. 

2022/23 мавсумда унга Усмон Дембеле рақобатчи эди ва тан олиш керак, француз эндигина жамоага келиб қўшилган Рафиньядан муҳимроқ саналари, лекин у жароҳат сабаб мавсумнинг катта қисмини ўтказиб юбориши оқибатида бразилиялик учун яхшигина ўйин амалиёти берилди. Дастлабки мавсумида у 10 та гол уриб, 12 та ассист амалга оширди. Ёмон эмас, кейинги мавсум эса камроқ учрашув ўтказиб, 10 марта рақиблари дарвозасини ишғол қилиб, 13 бора шерикларига голли пай берди. Бу вингернинг трансфери омадсиз бўлмаганига етарли ҳисобланади. Бироқ битта муаммо бор эди. Бу унинг позицияси. 

Хави Рафиньядан 2022 йили Чемпионлар лигаси доирасида бўлиб ўтган "Интер"га қарши ўйинда чап қанот вингери сифатида фойдаланиб кўрган. Одатда чапақай футболчиларга бу позицияда ўйнашга қийнлишади. Дастлаб, қаҳрамонимиз учун ҳам шундай бўлди. Бу учрашувда Рафинья 29 та аниқ пас бера олгани билан мақтана олади. Биронта дриблинг, аниқ зарба, хавфли вазият яратмаган ўйинчи сифатида майдонни тарк этади. Аммо бу билан Хави таслим бўлгани йўқ. Мураббий уни фақат ўнг томонда фойдаланишга қарши эди. Асосий сабаб, бу иккита қанотнинг даражасини тенглаштириш. Ямалдан чиқиб келганидан кейин бу жамоага янада керакли нарсага айланди. 

Орадан бир йил ўтиб, Рафинья ПСЖга қарши баҳсларда тўлиқ чап қанот вингери сифатида ўйнади. Бу сафар у 2 та ўйинда 3 та гол уришга муваффақ бўлди. Бир йил олдингига қараганда анча яхши натижа, лекин барибир камчиликлари бордек туюларди. Бу мавсумдан эса футболчи нафақат чап қанотда, балки марказда ҳам қийналмасдан ҳаракат қилаётганига гувоҳ бўляпмиз. Ханс-Флик вингерни жамоанинг энг муҳим футболчиларидан бирига айлантирмоқда. 

Ушбу ёзда "Барса" битта қап қанот вингери билан шартнома имзолашга ҳаракат қилди. Нико Уильямс, Луис Диас ва Рафаэль Леаулар ҳақида тез-тез миш-мишлар чиқиб турди. Бу эса Рафиньяни кетиши кераклига ва шундан кейин битта вингер олиб келиниши мумкинлигини англатарди. Футболчи эса барча таклифларни рад қилиб, клубда қолиб, ўз ўрни учун курашишни танлади ва бугунги кунга келиб яхшигина мукофотланмоқда. 

Рафинья ушбу мавсум фаолиятидаги илк хет-трикни нишонлашга улгурди. Шу билан бирга, аллақачон 7 та ўйинда 8 та голда иштирок этган. "Вильярреал"га қарши ўйинда Тер Штеген жароҳат олганидан кейин жамоа сардори сифатида майдонда ҳаракат қилди.