Бартомеу "Реал" сўрови бўйича молиявий ҳужжатларни тақдим этишдан бош тортди

"Барселона"нинг собиқ президенти Жозеп Бартомеу Негрейра иши доирасида "Реал" томонидан сўралган молиявий ҳужжатларни тақдим этишни рад этди.

Эслатиб ўтамиз, 2023 йилда "Барселона" ва унинг раҳбарияти Испания Ҳакамлар техник қўмитаси (CTA)нинг собиқ вице-президенти Хосе Мария Энрикес Негрейрага амалга оширилган тўловлар бўйича пора беришда айбланган эди. Суд бу тўловларни жиноят сифатида баҳолаб, 2001 йилдан 2018 йилгача бўлган даврда Негрейрага бир неча миллион евро ўтказилганини қайд этган.

Маълум қилинишича, суд жараёнида хусусий айбловчи сифатида иштирок этаётган "Реал" Негрейрага қилинган тўловлар билан боғлиқ ҳужжатлар, жумладан, аудит текширувлари, молиявий таҳлил ҳисоботлари ва йиллик ҳисоботларни сўраб чиққан.

"Marca" нашри "Que t’hi Jugues" дастурига таяниб хабар беришича, Бартомеу ўз адвокати орқали судьяга мурожаат қилиб, "Реал" сўровига жавобан қўшимча ҳужжатларни тақдим этмаслигини билдирган. Унинг фикрича, Мадрид клуби бу ҳужжатларни суд жараёнидан ташқари мақсадларда ишлатиши мумкин.

Бартомеу томонидан берилган баёнотда таъкидланишича, 18 йиллик даврни қамраб олган тўлиқ ҳуқуқий ва молиявий ҳисоботлар нафақат суддаги рақиб, балки спорт ва молия соҳасидаги тўғридан-тўғри рақиб томонидан сўралмоқда. Шунингдек, мазкур ҳужжатлар "Барселона"нинг ички молиявий ва тижорий фаолиятига оид маълумотларни ўз ичига олиши, улар эса суд ишига алоқаси бўлмаган мақсадларда қўлланилиши мумкинлиги қайд этилган.

Баёнотда, шунингдек, Бартомеу президентлиги даврига тегишли барча тўловлар ва кўрсатилган хизматлар иш материалларида мавжуд экани, тақдим этилган ҳисоботлар айнан унинг раҳбарлик қилган даврига тўғри келиши алоҳида таъкидланган.