"Башакшехир" бош мураббийи: "Уч очко олганимиздан жуда хурсандман"

Туркия Суперлигининг 14-турида "Истанбул Башакшехир" жамоаси "Касимпаша"ни 3:1 ҳисобида мағлуб этди. Учрашувдан сўнг клуб бош мураббийи Нури Шаҳин ўз фикрлари билан ўртоқлашди.

"Биринчи бўлим биз истаган тарзда кечди. Рақибнинг икки хил тактикада ўйнаши мумкинлигини инобатга олиб тайёрлангандик. Биринчи бўлимда шогирдларим жуда ижобий ўйин кўрсатишди ва керакли ҳисобни қўлга киритдик.

Иккинчи бўлим ҳақида бундай дей олмайман. Бу ҳолат бир неча бор такрорланмоқда. Кучни тўғри тақсимлаш борасида ўсишимиз керак. Ўйинни 90 дақиқа давомида барқарор ушлаб турсак, жуда кучли жамоага айланамиз. Бугун "Касимпаша"га қарши баҳсда кераксиз вазиятда майдонда бир киши кам бўлиб қолдик ва шундан кейин қўшимча куч сарфлашга тўғри келди.

Аммо уч очко олганимиздан жуда хурсандман. Айниқса, ўтган турдаги "Трабзонспор"га қарши мағлубиятдан сўнг бу ғалаба биз учун даво бўлди. Олдинда ҳали узоқ йўл бор, аммо жамоа тўғри йўлда. Ишонаманки, охир-оқибат муваффақиятга эришамиз", — деди Шаҳин.

Маълумот учун, ушбу баҳсда Элдор Шомуродов ва Аббосбек Файзуллаев ўз ҳисобига гол ёздириб қўйди.