"Бавария" Чемпионлар лигасини ютмагунича "Реал" ва "Ливерпуль" сўраган футболчини сотмайди

«Бавария» спорт директори Макс Эберл жамоа ҳужумчиси Майкл Олисе трансфери бўйича саволга аниқ жавоб қайтарди.

«Агар мақсадимиз Чемпионлар лигасини ютиш бўлса, уни сотиш ҳақида гап ҳам бўлиши мумкин эмас. «Бавария»нинг ўзига хос жиҳати шундаки, бизга қандай таклиф келмасин, қароримизни доим ўзгартиришга ҳожат йўқ», — дея Эберл сўзларини CFBayern учун журналист Кристиан Фальк келтиради.

Эберлнинг таъкидлашича, Олисе билан тузилган шартнома узоқ муддатли ва унда белгиланган мажбурий бўшаш бадали (выкуп) кўзда тутилмаган. Унинг сўзларига кўра, келаси ёзга бориб клуб футболчи шартномасини узайтиришга тайёрми-йўқми, шу борада аниқ тасаввурга эга бўлиши керак.

Аввалроқ Олисега «Ливерпуль» клуби ҳали ҳам қизиқиш билдираётгани ҳақида хабарлар тарқалган эди. Ўтган ёзда вингерни ўз сафига қўшиб олишга «Реал» ҳам уринган.