“Бавария”нинг португалиялик футболчи борасидаги таклифи рад этилди

"Бавария" "Атлетико" ҳужумчиси Жоау Фелишга қизиқиш билдирмоқда, деб хабар беради “Sport1.de” нашри.

Манбага кўра, Ҳасан Салиҳамиджич бошчилигидаги Мюнхен клуби раҳбарияти 22 ёшли португалияликни Бундеслигага таклиф қилиб, ўз таркибни кучайтиришни режалаштирган.

Июнь ойида "Бавария" ҳужумчининг трансфери борасида Мадрид клуби билан музокаралар бошлаган, бироқ “немис машинаси”нинг биринчи таклифи “матрасчилар” томонидан рад этилган.

“Бавария” португалиялик учун “Атлетико”га 80 миллион евро тўлашга тайёр эканлигини билдирган. Аммо мадридликлар футболчини камида 100 миллион евро эвазига қўйиб юбориши мумкинлигини маълум қилган.

"Бавария" Жоаунинг нархини пасайтириш учун ҳимоячи Бенжамин Паварни қўшиш вариантини ҳам кўриб чиқди. Аммо “матрасчилар”га бу таклиф ҳам маъқул келмади.

Фелиш ўтган мавсум "Атлетико" сафида 34 та ўйин ўтказиб, ўз ҳисобига 10 та гол ва 6 та голли узатмани ёздириб қўйди. Ҳужумчининг клуб билан шартномаси 2026 йилнинг 30 июнига қадар амал қилади.