Беллингем энди “Реал”га ёрдам бера олмайди

Испания чемпионатидаги дебют мавсумидаёқ, жамоани мамлакат чемпиони ва Чемпионлар лигасида ғолиб чиқишига ҳисса қўшган Жуд Беллингем энди мадридликларга маълум муддат ёрдам бера олмайди.

Англиялик ҳужумкор футболчи елкасидаги жароҳатини операция қилдириши лозим. У жарроҳлик столига ётса, мавсумнинг стартини ўтказиб юборади.

The Athletic нашрининг ёзишича, Беллингем ўтган йили муҳим ўйинларни ўтказиб юбормаслик ва Европа чемпионатида қатнашиш имкониятини қўлдан чиқармаслик учун оғриққа чидаб ўйнашга мажбур бўлган.

Энди бу муаммони тўлиқ ҳал қилиш керак. Беллингемнинг операциядан кейинги  реабилитацияси уч ой вақт олиши тахмин қилинмоқда.