Benzemaning masalasi tez orada hal qilinadi

Saudiya Arabistoniga katta umidlar bilan yo‘l olgan Karim Benzemaning faoliyatida murakkab vaziyat vujudga keldi.

35 yoshli forvard “Al-Ittihod” rahbariyati bilan kelisha olmay qolgan. Tajribali hujumchi bosh murabbiy Marselo Galyardo tomonidan mashg‘ulotlardan chetlatilganini hazm qila olmayapti.

Taniqli jurnalist Fabritsio Romanoning ma’lum qilishicha, Karim tez orada klub rahbariyati bilan uchrashuv o‘tkazadi. Muzokara davomida hujumchining klubdagi faoliyati muhokama qilinadi.

Karim Benzema Evropaga qaytmoqchi ekani aytilyapti. Unga Frantsiya va Angliya klublaridan xaridorlar bor.

Biroq mutaxassislarning ta’kidlashicha, Benzema ortga qaytishi uchun maoshining katta qismidan voz kechishiga to‘g‘ri keladi. Top-ligalarning biror bir klubi unga saudiyaliklar to‘layotgan mablag‘ni bermaydi.