Бир дақиқада гол урган Шомуродовнинг ўйини қандай баҳоланди?

Италия кубогининг нимчарок финал босқичида “Рома” ўз майдонида “Сампдория” футболчиларини қабул қилиб, 4:1 ҳисобида зафар қучди.

Клаудио Раньери шогирдлари рақибга қарши ҳужумкор ўйин кўрсатди. Артём Довбик дубль қайд этган бўлса, Томмазо Балданьци ва Элдор Шомуродов биттадан тўп киритди.

Учрашувдан кейин нуфузли манба – calciomercato.com портали “Рома” футболчиларининг ҳаракатларини қуйидагича баҳолади.

Мэтью Райан 6:

Мухлислар билан тўлган “Олимпико” стадионидаги учрашувда ўйнаш имконига эга бўлган дарвозабон бироз ҳаяжонланди. Шунга қарамай, ишончли ўйнади.

Зеки  Челик 6:

Ўйинга киришиб кетиши қийин бўлди. Бир неча пасларни ўтказиб юборди. Кутилган даражада ўйнай олмади.

Эван Ндика 6,5:

Жанлука Манчини ва Матс Хуммельс йўқлиги туфайли бошланғич таркибдан жой олган иқуарлик ўйинчи деярли бехато ўйнади.

Марио Эрмосо 5,5:

“Комо”га қарши учрашувдаги хатоларидан кейин хотиржам ўйнашга уринди. Лекин айнан унинг хатосидан кейин рақиб “Рома” дарвозасини ишғол қилди.

Алексис Салемакерс 7:

Ўнг қанотда яхши ўйнади. Унинг пасидан кейин Артём Довбик гол урди. Салемакерс жуда яхши ўйин ўтказди. Ўрнини Матиас Сулега бўшатиб берди.

Матиас Суле 6:

Суле ҳужумни кучайтирди. Довбикни голли вазиятга чиқарди. Ўзининг зарбаси тўсинга тегди.

Николо Пизилли 6,5:

Ёш футболчи ўйиндан ўйинга ўсиб бормоқда. Майдон марказини яхши ушлаб турди. Ўрнини Энцо Ле Фега бўшатиб берди.

Энцо Ле Фе 6:

Рақибнинг ҳужумларини бузишда бўшроқ ўйнади. Бир неча пасни қайтара олмади.

Леандро Паредес 6,5:

Саломатлигини тиклаб майдонга қайтган тажрибали юлдуз ярим ҳимоя чизиғини оқилона бошқариб борди.

Анжелиньо 6,5:

Чап қанотни ўзиники қилиб олди. Клаудио Раньери унинг чапақайлигидан фойдаланмоқда. Анжелиньо Элдор Шомуродовни голли пас билан таъминлади.

Томмазо Балданьци 7:

Яна ўзини кўрсатди. Гарчи Раньери келганидан кейин ўйин вақти қисқарган бўлса-да, гол уриб, мураббийлар штаби ишончини оқлади.

Никола Залевски 6:

Раньери уни ҳужумкор футболчи сифатида ўйнатяпти. Лекин бу гал ҳаракатлари бироз бўш чиқди.

Артём Довбик 7:

Кутилган ишончни бир жуфт голи билан оқлади. Аввалроқ, Раньери уни танқид қилганди. “Рома”даги илк дублини нишонлади. 78-дақиқада ўрнини Элдор Шомуродовга бўшатиб берди.

Элдор​ ​Шомуродов 7:

Ўзбек футболчиси майдонга тушганига бир дақиқа бўлар-бўлмас якуний ҳисобни таъминлади. Унинг бош билан берган зарбаси рақиб дарвозабонини ожиз қолдирди. Захирадан ўйинга қўшилган футболчи учун бундан яхшиси бўлмаса керак.

“Рома” футболчилари чорак финалда “Милан”га қарши тўп тепади. Бу босқич икки учрашувдан иборат бўлади. Ўйинлар 5-26 февраль кунлари бўлиб ўтади.