Биз кутган он келди, энди ортга йўл йўқ. Илия Топурия Жастин Гэтжига қарши…

Хабарингиз бор, қарийб бир йилдан буён UFC оммаси Америка Қўшма Штатларидаги Оқ Уйда ўтказилиши режалаштирилган турнирни интиқлик билан кутяпти, сўнгги вақтларда эса кунлар санашни бошлаб юборган. Дастлаб, 8 ёки 9 титул жанги бўлади, дейилгани боис ҳозир барчанинг дили хуноб, бироқ эълон қилинган жанглар ҳам фантастик даражада эканлиги ҳеч кимга сир эмас.

Бир тарафда енгилмас Топурия, бир тарафда уни мағлуб этишга ваъда берган Гэтжи, бир тарафда афсонавий Перрейра, бир тарафда "пистирмадаги бўри" – Сирил Ган, бир тарафда Майкл Чендлер, бир тарафда Шон О’Мэлли, бир тарафда Жош Хокит нариги тарафда Трампнинг талабларига биноан Деррик Льюис…

Етти мўжизадек етти жанг билан бизни кутиб турган кеча Ўзбекистон вақти билан 15 июнь куни соат 05:00 да бошланади. Ушбу кеча очиқ осмонда, ўтказилиши режалангани боис ёмғир ёғиш эҳтимоли ҳам гидрометереологлар томонидан прогноз қилиняпти. Шунингдек, ёз мавсумининг бу пайтида пашша, чивинларнинг кўплиги ҳам тўсқинлик қилиши мумкин, деган ҳавотир бор. Промоушен раҳбари Дана Уайт нима бўлган тақдирда ҳам энди ортга йўл йўқлигини таъкидлади. Лекин олдинда бизни нималар кутиб турибди, буниси сўроқ остида.

Камида 90 % тўқнашувлар қизиқарли ва мунозараларга бой ўтиши аниқ. Зеро ушбу кеча тарих зарвароқларига олтин ҳарфлар билан ёзилиши лозим. 

Эътиборлиси, ушбу оқшом сеҳрли диёр мустақиллигининг 250 йиллик юбилейини нишонлаш мақсадида ташкилланаётганидир. Аввалига 4 июль деб белгиланиб, кейинчалик 20 кун олдинга сурилган эди. Транслияция пайтида ҳам спортчиларнинг таништирув видеолари ўрнига Америка ҳақидаги роликлар намойиш этилмоқда. 

Илия Топуриянинг ташқи кўринишига қараб баҳо берадиганлар уни ҳаваскор спортчи, деб ўйлайди. Аммо унинг зарбасига UFC даги юлдузлари – Макс Холлоуэй, Чарльз Оливейра ва ҳатто Александр Волкановски ҳам дош беролмади. Шу боис бу баҳсда кўпчилик фаворит сифатида Илияни кўрсатмоқда. Лекин шуни ҳам алоҳида таъкидлаш керакки, охирги пайтларда фаворит, дея эътироф этилаётган жангчилари мағлубиятга учрамоқда. Шу боис бу сафар техник тахлилнинг ўзи билан чекланамиз.

Топурия зарба пайти “ўткир бурчак” қоидасига амал қилади. Ўтмас бурчакдан зарбани деярли ишлатмайди. Аниқликка эътибор қаратади ва рақиб ҳимоясини бузиб ўтишга ва ҳатто уларни "комфорт" зонасидан чиқариб, ожиз нуқтасини топишга ва ана шу ерга портловчи зарбалар беришга ҳаракат қилади. Бироқ Жастинга қарши баҳсда кардиоси ҳам мустаҳкам бўлмоғи даркор. Илиянинг грэплинги ҳақида маълумот бериш шарт эмас. Чунки "Эл-Матадор" ушбу маҳоратидан фойдаланмай қўйган, мазкур баҳсда ҳам фойдаланишига хожат қолмаса керак. Рақиби Гэтжи спортга жиу-житсу орқали кириб келган бўлса-да, партерда жанг қилишни истамайди. Буни интервьюларида жуда кўп айтиб ўтган.

Жастин Гэтжи – лигадаги энг томошабоп жанг кўрсатувчи ММАчилардан бири. Иштирокидаги деярли ҳар бир жангдан сўнг бонус олган. Айтишича, бу баҳсда ютадими, ютқазадими унга қизиғи йўқ, муҳими муносиб иштирок этиш. Бироқ ғалабадан умиди катта. Унга ҳеч ким ишонмаяпти, бироқ спорт айнан мана шундай ҳикоялар билан тўла эмасми?! Қолаверса, яқинда ўтказилган Шон Стриклэнд ва Хамзат Чимаев воқеасини ҳали унутганимиз йўқ. Жастин оёқ зарбаларини йўллаш ва улардан ҳимояланишда жуда моҳир. Америкаликнинг таъкидлашича, Холлоуэй, Оливейра ва Волкановски Топурия истаганидек жанг қилишибди, аммо у ўзининг услубига эътибор қараташи ва Илиянинг тузоғига тушмаслигини эътироф этди. 

Арман Царукян -- мазкур тўқнашувнинг захира жангчиси ҳисобланади. Статистикага қарасак, у кетма-кет иккинчи бор чемпионлик баҳсида захирадан кўриниш бермоқда. Буни Дана Уайт тасдиқлади, аммо Арманнинг ўзи рад қилмоқда. Шояд келмайдиган бўлса, Дана ундан бира тўла кечиб юбориши ҳам мумкин, зеро унинг аввалги жазоси ҳануз тугагани йўқ. Аслида бу ҳам бир жазо.

Азизбек ҒОЗИЙ тайёрлади