Биз “Манчестер Сити”га эътибор бермаймиз

Англия Премьер-лигасида пешқадамлик қилаётган “Арсенал” устози Микель Артета унинг жамоаси энг яқин таъқибчи – “Манчестер Сити” натижаларига эътибор бермаётганини айтди.

Артетанинг сўзларига кўра, “Сити” чемпионлик учун курашда “Арсенал”ни босим остида қолдира олмайди, чунки “канонирлар” бор эътиборни ўзларининг натижаларига қаратишган.

- “Сити” ғалабаси ҳақида нима дейишим мумкин? Биз бунга эътибор бермаймиз. Биламан, сиз журналистлар эътибор берасиз.

Биз фақат ўз натижаларимизни, ўйинимизни назорат қила оламиз ва мавсум қанчалик узоқ давом этишини ҳамда бу лига қанчалик қийинлигини биламиз.

Бори шу. Ҳар бир кундан завқланиш керак. Қўлдан келганча ҳаракат қиламиз, кейин нимага эришишимизни кўрамиз, - деди Микель Артета ESPN нашри вакилларига.

17-турдан кейин “Арсенал” 39 очко жамғарган ҳолда биринчи ўринни эгаллаб турибди. “Манчестер Сити” эса, улардан икки очко кам жамғариб, кейинги поғонада жойлашган.