"Бёрнли" мураббийи Дастан Сатпаев жароҳати тафсилотларини маълум қилди

«Бёрнли» бош мураббийи Ники Хайен инглиз Чемпионшипининг тўртинчи турида «Мидлсбро»га қарши ўйинда жамоанинг қозоғистонлик  ҳужумчиси Дастан Сатпаев ҳаракатларини юқори баҳолади, шунингдек, футболчининг эҳтимолий жароҳати ҳақида ҳам тўхталиб ўтди. 

Учрашув 1:1 ҳисобида дуранг билан якунланди. «Бёрнли» сафида майдонга асосий таркибда тушган Дастан Сатпаев 80 дақиқа ўйнади. Алмашинув пайтида у сон орқа қисмига қўл ушлаб, ноқулайлик сезаётгани кўринди. Шунга қарамай, Қозоғистон терма жамоаси аъзоси «Бёрнли» таркибида учрашувнинг энг яхши ўйинчиси, деб топилди.

«Уни албатта тўлиқ тиббий кўрикдан ўтказишимиз керак бўлади. Ҳозирча кўринишига қараганда, унда шунчаки мушаклар тортиб қолган. У жуда яхши ўйин намойиш этди. У учун жуда хурсандман, 18 ёшли йигит жамоадошлари учун намуна бўла олаяпти. Умуман олганда, Дастан катта иштиёқ кўрсатди, ўйинга фаол қўшилди, бир неча хавфли вазиятлар яратди. Жамоада ҳамма уни ҳурмат қилади, унинг камтарлигига юқори баҳо беради... Жуда яхши, очиқкўнгил йигит. У тинмай меҳнат қилади ва майдонда фарқ яратишга ҳаракат қилади», — деди Ники Хайен.

Мураббий шунингдек, Сатпаевнинг Англия чемпионати шароити ва янги талабларга қай тарзда мослашаётгани ҳақида ҳам фикр билдирди.

«Ҳа, у аста-секин мослашаётганини кўряпмиз. Лекин биласиз, Англияда лига жуда қаттиқ, жисмоний курашлар кўп бўлади, шунинг учун биз уни маълум маънода асрашга ҳам ҳаракат қиламиз. Ҳар доим ҳам бунга эришолмаймиз. Унда кичик жароҳат бор, бу — мушак тортиши, аммо жиддий оқибатларсиз ўтиб кетади, деган умиддамиз. Ҳеч ким уни узоқ муддатга сафдан чиқариб қўядиган жароҳат бўлишини истамайди. Унинг 90 дақиқа давомида ўйнаётганини кўряпсиз, бу тажрибали футболчилар учун ҳам осон эмас, ёш йигит ҳақида гап кетганда эса янада қийин», — дея қўшимча қилди «Бёрнли» устози.

Инглиз Чемпионшипининг навбатдаги турида «Бёрнли» ўз майдонида «Бристоль Сити»га қарши баҳс олиб боради. Учрашув 5 сентябрь куни бўлиб ўтади.