Бокс. Ўзбекистон терма жамоаси Париж-2024 Олимпиадасига лицензия жамғариш бўйича Осиёда тенгсиз бўлди!

Хабарингиз бор, 26 июлдан 11 августгача Франциянинг Париж шаҳрида Париж-2024 ёзги Олимпиада ўйинлари бўлиб ўтади. Ҳозиргача ушбу мусобақанинг барча йўлланма берувчи турнирлари якунланди ва терма жамолар қўлга киритган лицензиялар аниқ бўлди.

Якуний натижаларга кўра, Франция пойтахтида бўладиган ўйинларда бокс бўйича энг кўп лицензияни Океания минтақаси вакили Австралия терма жамоаси қўлга киритди. "Яшил қитъа"дан ушбу Олимпиадада нақд 12 та вазнда боксчи иштирок этади. Бу борада иккинчи ўриндан Ўзбекистон терма жамоаси жой олди. Вакилларимиз 4 йилликнинг энг нуфузли турнирида 11 та вазн тоифасида иштирок этади. Терма жамоамиз ушбу натижа орқали Осиё қитъасида биринчи ўринни эгаллашди. 

Дунё бўйича кейинги ўринларда Бразилия, Ирландия ва Қозоғистонлик боксчилар жой олишган. Ушбу давлат вакилларида 10 тадан лицензия бор. 

Бундан ташқари Ўзбекистон ва қўшнимиз Қозоғистон терма жамоалари эркаклар вазнида тўлиқ таркиб билан иштирок этади. Аёлларда ушбу рекорд Ирландия ва Австралияга тегишли. Улар ҳам тўлиқ таркибда аёллар мусобақаларини бошлашади.