Бош мураббий Файзуллаев нечта гол уришини айтди
Ўзбекистон миллий терма жамоаси ҳужумкор футболчиси Аббосбек Файзуллаев ўйнаётган ЦСКА 2025 йилда ижобий натижаларни қайд эта бошлади.
Россия Премьер-лигасининг 22-турида “армиячилар” ўз майдонида Маҳачқалъанинг “Динамо” жамоасини қабул қилиб, 2:0 ҳисобида зафар қучди.
Аббосбек Файзуллаев ФИФА кунларида Қирғизистон ва Эрон терма жамоаларига қарши ўтказилган учрашувларда фаол қатнашганига қарамай, ЦСКА сафига қўшилганидан кейин Премьер-лига ўйинида ҳам бошланғич таркибдан жой олди.
ЦСКА янги йилнинг илк учрашувида Россиянинг кейинги йиллардаги энг қудратли клуби – “Зенит” майдонидан дуранг билан қайтганидан кейин, Премьер-лига доирасида кетма-кет учта учрашувда ғалаба қозонди.
Беллашувдан кейин “армиячилар”га устозлик қилаётган сербиялик мутахассис Марко Николич учрашув ҳақида фикр билдириб, Аббосбек Файзуллаевнинг ўйинини ҳам баҳолади.
- Футболчиларга офарин, дарвозамиз дахлсизлигини сақлаган қолган муҳим ғалабага эришдик. Муносиб тарзда зафар қучдик, юзта вазият яратдик, ўйин жуда томошабоп бўлди. Биринчи навбатда, Тамерлан Мусаев ва Аббосбек Файзуллаевнинг дарвозабон билан бирга бир чиққан 100 фоизли вазиятларини назарда тутяпман.
Стандарт вазиятлар иш берди, ўйин олдидан бунга алоҳида тайёргарлик кўргандик. Ўйиндан қониқдим, футболчиларнинг индивидуал ҳаракатларини назарий машғулотларда муҳокама қиламиз. Айниқса, Файзуллаев ва Миралем Пьяничнинг ўйинидан қониқдим.
Аббосбек ўсишда давом этмоқда. Мен унинг жуда катта салоҳиятга эга эканини кўриб турибман. Аббосни танқид қилаётганларнинг фикрига умуман қўшилмайман. Файзуллаев жуда катта ҳажмдаги ишларни уддалаяпти, бироқ ҳужумларни самарали якунлашни яхшилаши талаб этилади. Бунга эришган тақдирда ўнта гол уриб, ўнта ассист қайд этадиган даражага чиқади ва уни ҳеч ким ушлаб қола олмайди.
Файзуллаев янги ўйин схемасига тўлиқ мослашиб бўлди. Эслатиб ўтаман, унинг рўза тутиб ўйнаганини ҳам унутманг. Жамоамизда олти нафар мусулмон футболчи бор. Шуларни ҳаммасини инобатга олиб, Аббосбекнинг ҳаракатлари таҳсинга лойиқ.
Чемпионлик учун курашишни истаётганимни айтганман. Бироқ бу масалага бироз камтарона ёндашамиз. Ўйиндан ўйинга мақсад сари интиламиз.
Ҳозир бизда бу жараён ижобий кетяпти, лекин кейинги ҳар бир ўйин финалга тенг. Олдинга интилишда давом этишимиз зарур, чунки бешинчи ўрин бизни қониқтирмайди, - деди Марко Николич.
2023 йилнинг ёзидан бери ЦСКА шарафини ҳимоя қилиб келаётган 21 ёшли Аббосбек Файзуллаев жорий мавсум клублар миқёсидаги барча турнирларда 28 маротаба майдонга тушиб, ўз ҳисобига учта гол ва еттита ассист расмийлаштириб қўйди.
Тезкор: Ўруновни Европадаги машҳур клуб олмоқчи
Раньери ўйинни ўзгартирган Шомуродов ҳақида нима деди?
Гол уришига бир баҳя қолган Шомуродовнинг ўйини қандай баҳоланди?
Фикрлар