Ҳусанов туфайли тожик футболчиси бошқа чемпионатни танлади
Тожикистонлик футболчи Алишер Раҳимов таниқли инсайдер Иван Карпга берган интервьюсида ўзига Қозоғистондан таклиф бўлгани, бироқ Абдуқодир Ҳусанов тажрибасидан келиб чиқиб, Беларусь олий лигасига йўл олганини маълум қилди.
- Қарор қабул қилиш учун вақтим жуда кам эди. Беларусь ва Қозоғистондан вариантларни таклиф қилишди. “Сморгонь” клубини танладим.
Абдуқодир Ҳусановнинг тажрибаси шуни кўрсатяптики, ҳар қандай футболчи яхши клубларда ўйнаб кетишга қодир. Менинг мақсадим ҳам у каби Европанинг топ-лигаларида тўп тепиш.
Мен энди Медиалига ҳақида бош қотираётганим йўқ. У ерга қайтмоқчи эмасман. Бор эътиборимни профессионал футболга ва машғулотлар жараёнига қаратаман. Шу боис, Медиалига жамоаларига кўп бор рад жавобини бердим, - деди Алишер Раҳимов.
22 ёшли Алишер марказий ҳужумчи ҳисобланади. Шунингдек, ҳар икки қанотда ҳужумкор футболчи вазифасини бажариши мумкин. У футбол сир-асрорларини Тожикистоннинг “Баркчи” клубида бошлаган. Кейинчалик Медиалигада Россиянинг “Амкал” ва “Broke Boys” жамоалари шарафини ҳимоя қилиб, жами 49 та учрашувда 14 та гол ва 11 та ассист муаллифи бўлди.
Жорий йил бошида Тожикистон олий лигасида иштирок этаётган “Равшан” клубига қўшилган эди. Бироқ бирорта учрашувда иштирок этмай, Беларусь чемпионатига йўл олди.
Эслатиб ўтамиз, бугун жаҳон футболида ўчмас из қолдираётган Абдуқодир Ҳусанов ҳам профессионал футболчилик фаолиятини Беларусь чемпионатида бошлаган. Дастлаб, “Бунёдкор” академиясида таҳсил олган Ҳусанов Беларусга бориб, “Энергетик-БГУ” машғулотларида қатнашди. Кейин шу клуб билан биринчи расмий шартномасини имзолади.
Беларусь олий лигасида бир йил ўйнаганидан кейин 2023 йилнинг ёзида “Ланс”га йўл олди. Марказий ҳимоячимизнинг Ўзбекистон U-20 терма жамоаси сафида Аргентинада ўтказилган ёшлар ўртасидаги жаҳон чемпионатидаги ўйинлари Европанинг қатор клублари скаутларининг эътиборини тортди.
Франция чемпионатида бир ярим мавсум ўйнаган легионеримиз ўз салоҳиятини намойиш эта олди ва жорий мавсум унга Европанинг йигирмага яқин клуби оғиз солди. Қишки трансферлар даврида “Манчестер Сити” раҳбарияти ўзбек футболчиси учун жами 50 миллион евро (40 миллион евро бадал пули + 10 миллион евро бонус) тикиб, Абдуқодирни ўз сафига қўшиб олди.
Ҳусанов Англия чемпионатидаги биринчи ўзбек футболчиси сифатида“Манчестер Сити” сафида Премьер-лига, мамлакат кубоги ва Европа Чемпионлар лигасида дебютларини нишонлаб бўлди, янги жамоасида голлари ҳисобини ҳам очди.
Англияда майдонларида ўзини кўрсатаётган 21 ёшли легионеримизнинг трансфер суммаси бугунги кунда 35 миллион еврони ташкил қилмоқда. Ҳусанов Осиё футболининг энг қимматбаҳо ҳимоячиларидан бири ҳисобланади.
Энг муҳими, ўзбек футболчиси жаҳон футболининг энг катта клубларида нуфузли лигаларни забт этаётгани минтақамизнинг кўплаб ёш ўйинчиларига кучли мотивация бўлмоқда.
Фикрлар