Бразил энди "Динамо"да ўйнайди. Аммо у бразилиялик эмас, балки...

Айни пайтда БААда янги мавсумга тайёргарлик кўраётган "Динамо" клуби ҳам қишки селекция ишларини жадал олиб бормоқда.

Клуб матбуот хизматининг хабар беришича, 2026 йилги мавсум олдидан таркибни кучайтириш ишларини давом эттираётган «Динамо» ПФК легионер футболчи билан келишувга эришганини маълум қилади.

Дубайда йиғин ўтказаётган самарқандликлар сафига уругвайлик Мауро Бразил келиб қўшилди.

26 ёшли легионер ҳимоячи билан бир йиллик шартнома имзоланди. Мауронинг сўнгги клуби Уругвай чемпионати вакили «Серро-Ларго» клуби бўлиб, 2025 йилда Клаусурада 5-ўринни эгаллаган. 

Мауро Бразил ўз вақтида Уругвай U20 ёшлар жамоаси сафида 10 та ўйинда майдонга тушган. Шунингдек, у Уругвай миллий жамоасига ҳам чақирилган бўлиб, дебютини 2024 йилда Коста-Рикага қарши баҳсда (0:0) ўтказиб, марказий ҳимояда ҳаракат қилган.

Мауро Бразил – «Динамо» тарихидаги уругвайлик илк ўйинчига айланди. Ишонамизки, Бразил барчанинг ишончини оқлайди ва Самарқанд клубида катта муваффақиятларга эришади, - дейилади клуб матбуот хизматининг хабарида. 

Bienvenido, Mauro Brasil! 

Маълумотнома:
Мауро Алехандро Бразил
Туғилган жойи: Монтевидео, Уругвай.
Туғилган санаси: 27 апрел, 1999 йил
Амплуаси: Марказий ҳимоячи.

Бош мураббий Вадим Абрамовнинг ушбу легионердан ҳам умиди катта. Лотин Америкасидан таклиф қилинган ушбу футболчининг нималарга қодиролигини албатта чемпионат давомида кўрамиз.