Бразилия Шотландияни йирик ҳисобда мағлуб этиб, гуруҳ ғолиби бўлди

Жаҳон чемпионати гуруҳ босқичи 3-туридан ўрин олган баҳсда Бразилия терма жамоаси Шотландияни 3:0 ҳисобида мағлуб этди.

Майами шаҳридаги "Хард Рок Стэдиум"да ўтган учрашувда ҳисоб 7-дақиқада очилди. Райан Роша рақиб ҳимоячиси Скотт Маккеннадан тўпни олиб қўйгач, Винисиус Жуниор вазиятдан унумли фойдаланди.

22-дақиқада "Реал" вингери иккинчи бор гол урди. Бироқ VAR ёрдамида эпизод текширилганидан сўнг, Винисиуснинг Жек Хендрига қарши қоидабузарлиги аниқланди ва гол бекор қилинди.

Шунга қарамай, биринчи бўлимга қўшиб берилган вақтда Винисиус дубль расмийлаштирди. У Бруну Гимараэшнинг узатмасини бош билан дарвозага йўллади.

60-дақиқада эса Матеус Кунья ҳисобни йирик кўринишга келтирди. Бу сафар ҳам голли узатма муаллифи Бруну Гимараэш бўлди.

Учрашувнинг 76-дақиқасида Неймар майдонга туширилди. Шу тариқа, юлдуз футболчи 2023 йилдан бери илк бор Бразилия терма жамоаси сафида расмий ўйинда қатнашди.

Ушбу ғалабадан кейин Бразилия 7 очко тўплаб, гуруҳда биринчи ўринни эгаллади. Шотландия эса 3 очко билан учинчи поғонада қолди.