Бразилия терма жамоаси катта йўқотишга юз тутди

2026 йилги жаҳон чемпионати арафасида Бразилия терма жамоаси ҳимоячиси Уэсли Мисрга қарши ўртоқлик учрашувини охиригача ўтказа олмади.

АҚШнинг Кливленд шаҳрида бўлиб ўтган баҳс бразилияликларнинг 2:1 ҳисобидаги ғалабаси билан якунланди. Ғолиб жамоа сафида Бруну Гимарайнс ва Эндрик гол урди. Миср терма жамоасининг ягона голига Мустафо Зико муаллифлик қилди.

Уэсли учрашувнинг 17-дақиқасида алмаштирилди ва майдонни катта қийинчилик билан тарк этди. Дастлабки маълумотларга кўра, 22 ёшли футболчи чаноқ соҳаси мушакларидан жароҳат олган.

Бразилия терма жамоаси бош мураббийи Карло Анчелотти бу ҳолатга муносабат билдирди.

- Уэслини йўқотиш ачинарли. Энди текширув натижаларини кутишимиз керак. Ҳар қандай ҳолатда ҳам унинг ўрнини босадиган яхши футболчиларимиз бор, - деди Карло Анчелотти.

Жаҳон чемпионатида Бразилия “С” гуруҳида Марокаш, Гаити ва Шотландия терма жамоаларига қарши баҳс олиб боради. Миср эса G гуруҳида Бельгия, Эрон ва Янги Зеландия билан куч синашади.