Бу футболчини фақат катта суммага сотамиз!

Бундеслиганинг энг қудратли клуби “Бавария” чап қанот ҳимоячиси Альфонсо Дэвисни сотиш вариантини кўриб чиқмаяпти ва ОАВ хабарларига қарамай, уни трансферга қўймаган.

Бу ҳақда Sky Sports нашри журналисти Керри Хау хабар бермоқда.

Манба маълумотига кўра, немис гранди канадалик футболчи трансфери бўйича музокараларга фақат фавқулодда катта таклиф олган тақдирдагина очиқ бўлади.

Дэвиснинг ўзи ҳам “Бавария”ни тарк этишни истамаяпти. 25 ёшли ҳимоячи ҳар мавсум учун тахминан 20 миллион евро маош билан энг кўп пул топаётган футболчилардан бири ҳисобланади.

Аввалроқ журналист Кристиан Фальк Дэвисни “Манчестер Юнайтед” олишга ҳаракат қилаётгани ҳақида хабар берган эди.

Жорий мавсумда Дэвис барча мусобақаларда 20 та ўйинда иштирок этиб, битта гол ва учта голли узатма қайд этди. Футболчининг клуб билан амалдаги шартномаси 2030 йил ёзигача мўлжалланган. Transfermarkt маълумотига кўра, унинг бозор қиймати 45 миллион евро.