"Бу ҳаққоний футбол" - Асрор Алиқулов "Машъал"ни Суперлигага олиб чиққанидан сўнг нималарни айтди?

Муборакнинг “Машъал” жамоаси про лига мусобақасида муддатидан илгари Суперлига йўлланмасини қўлга киритди. Ғузорда “Шўртан”га қарши учрашувда “Машъал” ягона гол эвазига муҳим ғалабани қўлга киритди ва уч йиллик танаффусдан сўнг Суперлига йўлланмасини расмийлаштирди. “Машъал” бош мураббийи Асрор Алиқулов “Шўртан”га қарши беллашувдан кейин бир қатор саволларга жавоб қайтарди.

- Биринчи навбатда, “Машъал” мухлислари, бутун клубни, ҳомийларимиз, раҳбариятни, ҳар бир инсонни ажойиб ғалаба билан табриклайман. Ўйинга келадиган бўлсак, оғир учрашув кутгандик. Чунки бу дерби. Рақибни бугунги ўйиндан кейин турнир жадвалида юқорига кўтарилиши ёки кўтарилмаслиги имконияти бўларди, шу боис беллашувда рақиб томонидан жиддий кураш, узун пасларни кутгандик. Биринчи бўлимда қайсидир ҳолатларда сустроқ ҳаракат қилдик. Иккинчи бўлимда футболчиларимиз яхши ўйин кўрсатишди. Гол урдик, яна қарши ҳужумда ҳам гол уришимиз мумкин эди. Ғалаба учун барча футболчиларга, машғулотларда қанташган ва ўйнаган ҳамма-ҳаммага миннатдорчилигимни билдираман.

- Бугунги учрашувда ва ўтган сафарги баҳсда ҳам ВАР тизими қўлланилганди...

- Бизнинг раҳбарият томонидан барча тўловлари бажарилмоқда. Бунинг учун миннатдорчилик билдиряпмиз. Охирги пайтларда биз бу майдонда қийинчиликка дуч келгандик. Раҳбарият бизни қўллаб-қувватлаяпти ҳамда ВАР тизимини ўйинимизга жалб қиляпти. Ўйлайманки, бундан футбол ютади, бу ҳаққоний футбол. Кучлиги ютсин. Бу қайсидир томондан футболчиларга ҳам, бизга ҳам босим бўлади. Раҳбарият харажат қиляпти, аммо биз эплай оламизми-йўқми, шу нарсада ҳам хавотиримиз бор эди. Футболчиларга миннатдорчилик билдираман. Иккита ўйиндан бери ВАР ишлаяпти ва биз ғалаба қозоняпмиз.

- ВАР харажатлари катта суммани ташкил этадими?

- Тўғриси, қанчалигини билмайман. Лекин раҳбариятимиз нархи қанча бўлишидан қатъий назар ўша суммани тўлаб беришяпти. Ўйиндан бир неча кун аввал раҳбариятимиз тарафидан ВАР тизими қўлланилаётганидан хабаримиз бор эди. Эхтиёткорлик албатта муҳим ва биз ҳар томонлама учрашувларга тайёрланяпмиз.

- Биринчи бўлимда негадир ташаббус бериб қўйилди. Бу режада бормиди?

- Режада йўқ эди. “Шўртан”ни 1-дақиқадан катта куч билан ҳужумга ташланишини кутгандик. 15-20 дақиқа давомида чидашимиз талаб қилинарди. “Шўртан” томонидан босимни енгиб ўтишда қийинчиликка дуч келдик. Иккинчи бўлимда эса футболчиларимиз анча яхши ҳаракат қилишди.

- Иккинчи бўлим бошида Муҳаммад Юлдашев ўрнига Эргаш Исмоилов майдонга туширилди. Бу нимадир билан боғлиқмиди?

- Юлдашев биринчи бўлимда сустроқ ҳаракат қилди. Биринчи бўлимдан кейин биз уни қўллаб-қувватлаб, кўрсатмалар бериб яна майдонга туширмоқчи эдик. Аммо ўзини яхши ҳис қилмаётганлиги учун уни алмаштиришга мажбур бўлдик. Захирадан майдонга тушган ўйинчимиз яхши тўп сурди. Эргаш Исмоиловни яхши ўйин ўтказганидан хурсандман.

- Шахбоз Жўраевни қизил карточкаси ҳақида нима дея оласиз?

- У хиссиётларга берилди. Жамоани қийин аҳволга солиб қўйди. Кейинги ўйинимиз ўз майдонимизда “Бухоро” билан ўтади. Ҳар бир футболчи, захирадагилар ҳам бизда саноқли. Кўряпсиз, катта учрашувларда ўйнаш оғирроқ. Ўрнига энди бошқа футболчини тайёрлаймиз.

- “Шўртан” мавсум бошида энг кўп гол ўтказиб юборишда тўртталикка кирган. Нега “Машъал” воҳа дербисида қийналяпти?

- Тактик ҳолат, ўйин тизими иккинчи даражага тушиб қоляпти. Кўряпсиз, футболчилар ўзини ҳам, рақибни ҳам аямайдилар. Бундай учрашувларда футболчиларга маҳорат, тезкорлик керак. Рақибда ҳам, бизда ҳам гол уриш имкониятини яратиш қийин. Дерби ўз номи билан фақат курашларга бой. Шу боис бундай баҳсларда голлар кўп бўлиши амримаҳол.

- 2020 йили “Машъал” Суперлигага чиққанида айнан “Шўртан” билан 1:1 натижасини қайд этиб, бу ишни уддалаганди. Орадан 4 йил ўтиб, яна шу анъана давом этди. Энди таркиб кучайтириладими?

- Бундай дербиларда қийналяпмизми, Суперлигада ҳар бир ўйин қийин. Таркиб кучайиши керак.