"Бу жамоа билан чемпион бўламиз, бундан бошқа иложимиз ҳам йўқ, қаердадир хато қилдим деб ўйламайман" - Остон Ўрунов "Навбаҳор"га қайтиши, Россиядаги фаолияти ва Катанец ҳақида интервью берди

“Навбаҳор” клуби янги мавсум учун таркибини яна кўзга кўринган ва тажрибали футболчилар билан кучайтирди.

Айниқса, Россия клубларида фаолият олиб борган Остон Ўрунов Ўзбекистон чемпионатига, хусусан “Навбаҳор” клубига қайтди.

Албатта, бунда бош мураббий Самвел Бабаянинг роли катта. Яқинда Sports.uz журналисти Намангандаги “Навбаҳор” базасида Ўрунов билан суҳбатлашди.

- Остон, “Навбаҳор”га қайтишингиз наманганлик мухлислар учун катта хурсандчилик улашди. Қачондир Наманганга қайтиш ҳақида ўйлаганмисиз ёки барчаси режангиздан ташқари юз бердими?

- Бошида “Навбаҳор”га қайтиш режада йўқ эди. Режамда Европада тўп суриш эди. Кучли чемпионатларга кетиш ҳақида ўйлардим. Лекин шу ерда бўлишим тақдирда ёзилган экан. Бундан хурсандман.

- “Навбаҳор”да олдин ўйнаган пайтингизда энди тажриба тўплаётган футболчи эдингиз. Орадан маълум вақт ўтгач, бу ерга янада машҳурроқ ва тажрибали Остон Ўрунов сифатида қайтдингиз. Ўтган вақт давомида ўзингизда қанақа ўзгаришларни ҳис қиляпсиз?

- Олдин Наманганда ўйнаганимда ёш, энди порлаб чиқаётган футболчи эдим. Ҳозирги келишимда яхши тушуниб турибманки, мендан ҳамма кўп нарса кутади. Худо хоҳласа, барчанинг ишончини оқлайман. Яхши билиб турибман, мақсад чемпионликни қўлга киритиш. Бу жамоа билан чемпион бўламиз, бундан бошқа иложимиз ҳам йўқ. Шунинг учун қўлимиздан келганича бор кучимиз ва имкониятимизни кўрсатиб, ғалабаларга ҳиссамизни қўшиб, яхши натижалар қайд этамиз.

- Россияда “Спартак”, Уфа” ва “Урал”даги фаолиятингизни кузатиб бордик. Ҳар бир ўйнаган клубингизда ўзига яраша саргузаштлар, турли воқеалар юз бериб турди. Россиядаги фаолиятингизни қандай баҳолайсиз?

- Ҳаммаси зўр кетаётганди. Қаердадир хато қилдим, деб ўйламайман. Биринчи “Уфа”да тўп сурдим, ўзимни кўрсатдим. Ўшанда кўп клублар мени олишни хоҳлашди. ЦСКА, “Спартак”, “Рубин” каби жамоалар истаган. “Уфа” директори Газизов “Спартак” клубига ўтганида ундан қайси яхши футболчилар борлиги ҳақида сўрашган. У Ўрунов деб айтган ва бу хусусида ўз интервьюсида ҳам таъкидлаган. “Спартак” президенти ҳам рўйхатда Ўрунов менга ёқади, деб айтган. Кейин биз “Спартак”ка ўтиш бўйича келишдик. Бу клубга борганимда ҳаммаси яхши кетаётганди. Спорт формага кириб, астойдил ишлаётгандим. Орада коронавирус бўлиб қолдим. Кейин раҳбариятда қанақадир ажиотаж ва келишмовчиликлар бўлди ва бу орада мен қолиб кетдим. Ушбу вазиятда мендан ҳеч қанақа хато ўтмаган ёки ким биландир ниманидир талашиб қолмаганман. Ўзлари нимадир келиша олишмаган, бу таъсир қилди. Лекин Россияда мен учун барчаси яхши кетаётганди.

- “Урал” билан нима бўлди? У ерда кўп ўйнамадингиз. Бош мураббий эса ўйиндан аввал сиз билан юз берган ҳолат ҳақида гапирганди. Аслида нима бўлган?

- “Урал”да мураббий билан ҳамма ўйлагандек келишмовчилик бўлмаган. Шунчаки, биз бир-биримизга мос келмаслигимизни тушундик. Улар бошқача футбол ўйнайди ва менинг услубим тўғри келмайди. Икки томонлама дўстона келишиб, шартномани бекор қилганмиз.

- “Урал”га ўтиш сиз учун янглиш қарор эмасмиди?

- Йўқ. Бу жамоага ўтганим яхши эди.

- Бош мураббийи билан муносабатингиз қанақа эди?

- Муносабатларимиз яхши эди. Ишлаш услублари ҳам менга ёқарди. Гончаренко футболчилар билан ҳам зўр ишлайди. Орамизда тушунмовчилик бўлмаган. Кетаётганимизда ҳам биз илиқ хайрлашганмиз. Фақат боя айтиб ўтганимдек, “Урал” билан бир-биримизга мос келмадик.

- Мос келмаслик бу ўйин томонламами?

- Ҳа, ўйин бўйича. Ҳозирги “Урал”га мени алдаб, дриблинг қиладиган хизматларим керак бўлмади. Фақат жамоавий ўйин эди. Мураббийдан ҳеч бўлмаганда олдинга ўтганимда менга рақибларни алдаш мумкинми, деб сўрагандим. У йўқ деди ва тўп билан бўлганингда биринчи бўлиб бошингни кўтар ва бўш турган шеригинга узат деди ва алдашимга рухсат бермади. Агар мен алдамасам оддий ўйинчи бўлиб юраверардим.

- Россия клубларидаги фаолиятингиз давомида ҳозиргача қайси футболчилар билан яқин алоқани сақлаб қолгансиз?

- Россияда ўртоқларим кўп, ҳалигача алоқада бўламиз. “Уфа” ва “Спартак”даги йигитлар билан гаплашиб тураман. Бироқ “Урал”да ҳали улгурмагандим.

- 15 февралда юртимизда трансфер ойнаси ёпилди. Шу вақт ичида барча клублар селекция ишларини олиб бордилар. Клубларимиз томонидан амалга оширилган трансферлар орасида Остон Ўруновнинг “Навбаҳор”га қайтишини биринчи рақамли трансфер деб ҳисоблаш мумкинми? Бу фикрга қўшиласизми?

- Албатта, қўшиламан. Ўзбекистонда бўлган трансферлар ичида энг яхшиси бўлди. Бошқа ҳеч ким!

- “Навбаҳор”дан кетганингизда фаолиятингизда олдинга қадам бўлаётганди ва кейинчалик легионерга айландингиз. Ортга қайтгач, айрим гап-сўзлар бўлиши ҳам мумкин. Яъни, Ўруновнинг яна қайтиши ортга ташланган қадам деб ҳисоблашлари ҳам ҳеч гап эмас. Бунга муносабатингиз қандай?

- Гап-сўзлар ҳар доим бўлади. Россияда юрган пайтларимда ҳам бўлган. Минг зўр ўйнаб юрганимда ҳам, жароҳат олиб ўйнамаётганимда ҳам шундай бўларди. “Навбаҳор”га қайтишимни орқага қадам деб ўйламайман. “Навбаҳор” ростдан ҳам Ўзбекистоннинг энг кучли жамоаси. Бу қайтанга ўзим учун ҳам яхши-ку. Бунгача маълум вақт ўйнамагандим. Формамни тиклаб, “Навбаҳор”га ёрдам бера оламан.

- “Урал”дан кетиб Тошкентга қайтганингизда Самвел Бабаян “Навбаҳор”га чақиради, деган ҳаёл ўтганми?

- Юқорида айтиб ўтганимдек, режам хориж билан боғлиқ эди. Вариантлар бўлди. Самвел Бабаян жуда тажрибали. Бирга “Локомотив”да ҳам ишлаганмиз. Руҳий томонлама ва ўсиш борасида ҳам менга анча ёрдами тегади. “Навбаҳор”ни чемпион қилиб, яна четга кетиш режам бор.

- Сир бўлмаса, қайси клублардан таклифлар бор эди?

- Аниқ бир номни айтиш қийин. Вариант бўлади, кейин йўқ бўлиб қоларди. Ўзимни ҳам кутгим келмади. Аввало, спорт формамни тиклаб, кейин кетсам тўғри бўлади.

- “Навбаҳор”нинг ўтган йилги иштирокини кузатганмисиз?

- Ҳамма ўйинларини кўрдим. Яхши фикрдаман. Ўтган йили ҳам ажойиб жамоа йиғилганди. Охирида озгина етмай қолди.

- Наманганлик ашаддий мухлисларни яхши кўрасиз ва уларнинг босимини ҳам кўтара оласиз. Улар учун айтадиган гапингиз борми?

- Ишқибозлар фақат чемпионликни кутишсин. Қолгани бизни ҳам, уларни ҳам қониқтирмайди. Буни ҳамма тушуниб турибди. Биринчи ўйиндан шуни кутяпманки, бундай футболни яхши кўрадиган ишқибозлар қаршисида ўйнамаганимга анча бўлганди. Намангандаги муҳитни соғиндим. Охирги марта терма жамоа билан Наманганга келганимизда кўргандим. Ўшанда ҳам ҳамма Остон, Остон деб бақиришган, захирада ўтирганимда ҳам улар мураббийга Остонни тушир, деб ҳайқиришгани эсимда. Ишқибозларнинг сизга бундай ишончи янада мотивация беради ва руҳиятни кўтаради.

- Терма жамоа ҳақида гап очилди. Бош мураббий Катанец билан тез-тез гаплашиб турасизми ёки фақат йиғин чоғидами?

- Фақат йиғинлар пайтида гаплашиб турамиз.

- У ўз услубини терма жамоа ўйинчиларига сингдира олдими ёки бу жараён ҳамон давом этяптими?

- Жараён ҳали давом этяпти. Лекин у қанақа вазифалар қўйилганини билади. Ҳаммага тушунтирган ва қандай тактика қўллаётгани бўйича терма жамоада энди барчани тушунчаси бор. Шунга мослаб олиб боряпти.

- Катанецга ишонса бўладими?

- Ишонса бўлади. Ҳозирги натижаларидан кўрсангиз ҳам ишонса бўлади. Камерунни ютдик. Коста-Рикани ҳам ютаётгандик, аммо охирида бироз бўшашди ва иккита гол ўтказиб юбордик. Ўшанда мен ўйнамагандим.

- Катанец жамоасида ўзингизни қандай ролда кўряпсиз?

- Катанец ишонч билдиряпти. Йиғинлар чоғида кўп гаплашиб турамиз. Олдига чақиради ва қандай ўйнашим ҳақида тушунтиради. Чақириб, гапиргани менга ёқади. Ҳамма нарсани юзингизга айтади. Ҳеч нимани беркитмайди. Ўзбекистон шарафини ҳимоя қилишни ёшлигимиздан орзу қилганмиз. Шунинг учун албатта бор кучимиз билан терма жамоада ҳам ўйнаймиз.

- Ҳамманинг орзуси ҳисобланган жаҳон чемпионатига чиқишимиз қачон юз бериши мумкин? Вазиятга реал баҳо бера оласизми?

- Реал қарасак, навбатдаги жаҳон чемпионатида буни амалга оширишимиз керак. Буни ҳамма тушуниб турибдики, бизга жуда керак. Ҳозирги таркиб мундиалга чиқишга ва талабга жавоб беради.

- Бу борада Суперлигамиз савияси ҳам талабга жавоб бериш керак. Фикрингизча, чемпионатимиз даражаси ҳозир қандай?

- Ўтган йили чемпионат савияси анча кучайди. Томоша қилганингизда бу олдинги Ўзбекистон чемпионати эмас деб ўйлайсиз. Жамоалар кучайган ва рақобат ҳам. Қайси клуб ютишини билмайсиз. Ўтган йили ҳамма интригани “Навбаҳор” берди. Фақат чемпионликка озгина етмади.

- Асосий мақсадингиз?

- Европанинг топ-клубларида тўп суриш. Бунга ишонаман.

Шуҳратбек Жўраев.