"Бу клуб келажаги учун энг тўғри қарор" — "Тоттенхэм" президенти Постекоглу бўшатилиши ҳақида

"Тоттенхэм" президенти Даниэл Леви клубга узоқ йиллардан сўнг соврин ютишга ёрдам берган Анже Постекоглу нега бўшатилганини айтди. Раҳбар мураббийга миннатдорчилик билдирди.

"Анжега ишонч билдирганимиздан афсусланмайман. У жамоага мураккаб даврда келди ва илк мавсумидаёқ бешинчи ўринни эгаллади, иккинчи мавсумида эса бизга соврин ютиб берди. Ҳаммамиз беҳад ҳурсанд бўлдик.

Лекин клуб бундан ҳам юксак марраларни кўзламоқда — биз барча мусобақаларда кураш олиб боришни истаймиз. Келажакдаги ривожланиш учун ўзгаришлар зарурлигини англадик. Бу қарор биз учун осон бўлмади, лекин ишонамизки, бу "Тоттенхэм" келажаги учун энг тўғри қарор", — дея Левининг сўзларини келтиради Reuters.

Эслатиб ўтамиз, Анже Постекоглу қўл остида "Тоттенхэм" Европа Лигаси ғолибига айланган эди.